Lavrov: Blerja e sistemit S-400, kërkesë e Turqisë
Ministri i Punëve të Jashtme i Rusisë, Sergey Lavrov, ka refuzuar komentet e SHBA-ve se Ankaraja rrezikon sanksione mbi blerjen e sistemeve ruse të mbrojtjes ajrore S-400, duke i konsideruar si “shantazh”, raporton Anadolu Agency (AA).
“Zoti Mitchell deklaroi se Ankaraja mund të përballet me sanksione nëse blen S-400 nga Rusia. Kjo është pikërisht një shembull i një tentative për shantazh që synon të sigurojë konkurrencë të padrejtë ndaj kompanive amerikane”, tha Lavrov, duke folur në një konferencë për media pas takimit me homologen e tij të Austrisë, Karine Kneissle, në Moskë.
Shefi i diplomacisë ruse i referohej komenteve të ndihmës sekretarit të shtetit për çështjet evropiane dhe euroaziatike, Aaron Wess Mitchell.
Lavrov rikujtoi komentet e sekretarit të përgjithshëm të NATO-s, Jens Stoltenberg, se blerja turke e sistemit S-400 ishte një “vendim kombëtar” i bërë nga Turqia.
“Ndoshta, SHBA si anëtare e NATO-s duhet të respektojë zërin kolektiv të shprehur nga sekretari i përgjithshëm i Aleancës Veriatlantike”, tha ai.
S-400 është sistemi me rreze më i avancuar raketor kundër avionëve gjuajtës me një kapacitet të transportimit të tre llojeve të raketave të afta për të shkatërruar objektiva, përfshirë raketat balistike dhe ato kryeqëzuese.
Sistemi mund të ndjekë dhe të angazhojë deri në 300 objektiva në të njëjtën kohë dhe ka një kufi lartësie prej 27 kilometrash.
Dhjetorin e kaluar, Turqia njoftoi se kishte arritur një marrëveshje me Rusinë për blerjen e dy sistemeve S-400 deri në fillim të vitit 2020.
Mitchell, zyrtari i departamentit të shtetit të SHBA-ve, pretendoi se Turqia do të mund të përballej me sanksione të SHBA-ve nëse do të vazhdonte me planet për të blerë sistemet raketore ruse dhe se blerja mund të “ndikonte negativisht në pjesëmarrjen e Turqisë në programin F-35”.
