A TË VIJ
Te ti
A të vij te ti
Nëpër tehun e shpatës
A të vij
Me dashuri
Në majë të thikës
Me trenat e natës
A të vij
Me dashurinë e gufuar
Tregomë a të vij
E të më shohësh si mbaj
Në gishta hithra përvëluese
E tehut të shpatës
Rrëshqas drejt teje
O moj sorkadhe
O moj dashuria ime e moçme
A të vij te ti
O ëndërr e butë
A të vij
Nëpër një tel të bardhë
Nëpër një tel të gjelbër
A të vij
Me dashuri
Unë nisem drejt teje
Gjithmonë gjithmonë
Si gjethi të cilin e ngre era
Si fije pambuku
si flutura e qëndisur në këmishën tënde të bardhë
Nisem drejt teje
Se me ty bota rrotullohet më rehat
Me ty rritet dashuria si mështekna
Dhe vektorët e zinj
Nga ti
Drejt syve të mi lodhur e zemra ime e dërmuar
Lëshojnë nga një rreze drite nga një shikim
Me ty
Jam më i fortë se guri
Më i lartë se plepi
Më i fortë
Më i lartë
Te ti
A të vij te ti
Tregomë
Dashuria ime!
Poezi nga Asllan SELMANI
Zgjodhi Xhabir AHMETI
