fbpx

NATA DHE MALËSIA

1.

Në netët e qeta

Hëna bëhet nuse

E veshur në të verdha!

Natë. Qielli është i kaltër.

Ylli bie në fund të liqenit.

Në pendën e peshkut

Dritë…

Në shpinën e shkumëzuar të vales së trazuar

Dhe në bardhësinë e syprinës

Përvijohen figura mermeri!

Natë. Në hapësirën e qiellit

Vdes nga ndonjë yll

Midis kufijve të verdhë

Të lartësive

2.

Netët më sollën pranë lumit

Dhe më shndërruan në guacë

Me dy gjysma floriri!

Netët pastaj më bënë shigjetë

E cila i përgjon të përhumburit dhe largësitë

3.

Në Malësi

Në disa lule pemësh

Pikojnë e bien bardh si drita

Vesa

Freskia

Ngjyra

Dhe yjet!

Këtu nën barrën e shelgjeve

Zgjidhen enigmat e erës

Këtu,

Çdo ditë qielli çel bardh

Mbi majën e çdo ahu!

Këtu,

Kënga e uji kanë melodi të njëjtë

këtu

lulet e bletët

i lan shiu i argjendtë.

Këtu

Nën kësulën e kësaj hapësire

Rrjedhin lumenjtë e blerimit

Këtu

Rrjedh drita e shikimeve

4.

Malësia

Këtu edhe gjuha e gjetheve

Fle në notat e Moxartit

Malësia

Këtu edhe bardhësia e grigjës

Shkëlqen

Këtu fijet e barit i kemi kasolla

E arka ëndrrash

Këtu në çdo përrua valojnë shami kujtimesh.

5.

– Hej! Malësia po zgjohet

Dhe lindet një dritë e re.

Në pullaz ndalet e pushon

Fluturimi i ri

Me shikim kah pafundësia e blerimit

Në lumë freskohet

Zogu i largësive

Shiko

Në të gjitha anët

Është bardh. Mali është i bardhë,

I bardhë.

Edhe në dorë kam lule të bardha,

Lule dhuratë gjaku

Nga ky vend këtu.

6.

Në netët e qeta

Hëna bëhet nuse

E veshur në të verdha!

Kurse Malësia

bëhet vesh që kujdeset

Mos të qajë ndonjë fëmijë.

 

Poezi nga Asllan SELMANI
Zgjodhi Xhabir AHMETI

Lajme të ngjashme

Leave a Reply

Your email address will not be published. Required fields are marked *

Shiko edhe
Close
Back to top button