Takimi Nimic – Dimitrov – Koxias: për çështjen e emrit, do të propozohet formë juridike me vende të zbrazëta
Formë juridike, me vende të zbrazëta në çështjen e hapur do t’ua prezantojë ndërmjetësuesi Metju Nimic ministrave të Jashtëm të Maqedonisë dhe Greqisë në Vjenë të Austrisë, ka njoftuar agjencia greke ANA-MPA, transmeton Portalb.mk.
“Sipas informacioneve të deritashme, Nimic do të jetë i pari që do të flasë dhe do të prezantojë formën juridike, në bazë të së cilës do të arrihet marrëveshja e ardhshme të dy anëve në OKB, me vende të zbrazëta “për” çështjen e hapur, siç është emri”, shkruan ANA-MPA.
Sipas kësaj agjencie të lajmeve, pas prezantimit të Nimicit do të shprehen edhe qëndrimet e ministrit të Jashtëm të Maqedonisë, Nikolla Dimitrov dhe homologut të tij nga Greqia, Nikos Koxias.
“Pas kësaj do të vijojë prezantimi i qëndrimeve të të dy ministrave të Punëve të Jashtme dhe bisedimet për pozitat”, shkruan ANA-MPA.
Siç njofton kjo agjenci i lajmeve, takimi i treshës, Dimitrov – Nimic – Koxias do të mbahet në ministrinë e Jashtme të Austrisë duke filluar nga ora 09:30 (sipas kohës së Maqedonisë).
Përndryshe, në takimin në fjalë pritet që të bisedohet edhe për pikat kyçe të propozim-marrëveshjeve të shkëmbyera.
Mediat greke shkruajnë se pas Vjenës pritet që ministri i Punëve të Jashtme i Maqedonisë, Nikolla Dimitrov do të vizitojë Athinën.
Edhe përkundër dallimeve në qëndrimet e Shkupit e Athinës zyrtare, qeveritë e dy vendeve kanë shprehur gatishmëri për t’i dhënë fund këtij kontesti shumëvjeçar dhe optimizëm se do të arrijnë progres pikërisht sot. Për javën e ardhshme është caktuar një takim liderësh në Greqi ku ndër tjerash pritet të bisedohet edhe rreth përfundimeve të takimit të Vjenës.
Ndryshe, së fundmi pas 12 viteve, një ministër i Jashtëm i Greqisë ka zbritur me aeroplanin zyrtar në Aeroportin e Shkupit. Ai pati vizita me kreun më të lartë shtetëror, por edhe me liderët e partive politike.
Sipas asaj që deklaroi ai, Greqia “është për një kompromis të ndershëm”, ndërkaq homologu i tij, Dimitrov, deklaroi se Maqedonia nuk pranon emër të ngjitur i cili nuk do të përkthehej.
Kontesti 25 vjeçar
Ndryshe, Greqia dhe Maqedonia kanë çështje të hapur për emrin që nga pavarësimi i Maqedonisë në vitin 1991. Në vitin 1995, Kombet e Bashkuara u bënë ndërmjetës në zgjidhjen e emrit duke dërguar person special si mediator. Deri më sot, ndërmjetësimi nuk ka sukses. Greqia pretendon se shteti i Maqedonisë është duke e përdorur emrin e regjionit verior grek i cili mban emrin Maqedoni, përcjellë Portalb.mk.
Megjithatë, pas ardhjes në pushtet të Zoran Zaevit, kjo çështje është riaktualizuar duke rifilluar bisedimet për kontest. Pas një takimi të kryeministrave të Maqedonisë dhe Greqisë në Davos të Zvicrës, Zaev, njoftoi se Maqedonia ka vendosur që t’i ndryshojë emrat e autostradës dhe aeroportit të cilët e mbajnë emrin e figurës së kontestuar nga pala greke – Aleksandri i Maqedonisë. Me vendim të Qeverisë, autostrada u riemërua në “Miqësia”, ndërkaq aeroporti në “Aeroporti i Shkupit”.
Shpresat për integrim të Maqedonisë në NATO dhe BE, janë gjithnjë më të fuqishme, duke pasur parasysh se sinjalet e Komisionit Evropian janë se Maqedonia do ta rimerr rekomandimin për fillimin e bisedimeve hyrëse për anëtarësim në BE. Kjo u vërtetua edhe me publikimin e Strategjisë së KE-së për anëtarësimin e vendeve ballkanike në BE, por edhe nga kryetari i Komisionit Evropian, Zhan Klod Junker, i cili në javën e fundit të shkurtit ishte për vizitë në Shkup. Edhe pse, Junker tha se nuk mund të japë datë për fillimin e bisedimeve, megjithatë, shtoi se Maqedonia është në rrugë të drejtë. Megjithatë, përveç menjanimit të kontestit për emrin me Greqinë, që të anëtarësohet në BE, Maqedonia duhet të punojë edhe në sundimin e ligjit, rritjen e ekonomisë dhe konkurrencës, zhvillimin e arsimit dhe sigurisë si dhe komunikimin digjital.
- LEXO: Kryeministri grek, Cipras: Ndryshimi i kushtetutës është parakusht për marrëveshje të plotë të emrit
- LEXO: Dimitrov pret përparim në çështjen e emrit në takimin e tij me kolegun grek, Koxias në Vjenë
- LEXO: Koxias shoqërohet me protesta: të mos ndryshohet emri i Maqedonisë
- LEXO: Ja çfarë ka biseduar kryeministri Zaev me kryediplomatin grek Koxias (FOTO+VIDEO)
- LEXO: Osmani në takim me Koxiasin: Pres që ndërtimi i besimit të rezultojë me mbylljen e çështjeve të hapura
- LEXO: Koxias i ka treguar Ciprasit për vizitën në Maqedoni: Ka avancim, por dallimi ngelet rreth Kushtetutës
- LEXO: Koxias për kompromis të “ndershëm”, Dimitrov s’pranon emër të bashkuar pa përkthim (FOTO+VIDEO)
- LEXO: Koxias: Greqia është e fuqishme, nuk duhet të frikësohet nga kompromisi me një shtet të vogël
- LEXO: Strategjia e BE-së: ja çfarë ndryshime duhet të bëjë Maqedonia që të integrohet në BE
- LEXO: Çështja e emrit, Zhbogar: BE nuk pranon shtete që kanë problem me fqinjët
- LEXO: Han: Brukseli do të rekomandojë fillim të bisedimeve me Maqedoninë
- LEXO: Han “plotësisht i sigurt” se kontesti me emrin do të zgjidhet deri në korrik
- LEXO: Junker: Asnjë vend i Ballkanit Perëndimor nuk i plotëson kushtet për hyrje në BE
