Grekët po përgatiten të mbajnë protesta nëse arrihet marrëveshja për emrin e Maqedonisë

L. B. 13:21, 05-03-2018

Greqi protest — Foto arkiv, gjatë një proteste të grekëve kundër emrit të Maqedonisë

Protestë para Kuvendit të Greqisë dhe grevë e përgjithshme 48-orëshe planifikohet të mbahet nga organizatorët e demonstratave “për mbrojtjen e emrit të Maqedonisë” në Greqi, në rast se marrëveshja eventuale do t’i parashtrohet deputetëve për të dhënë dritën jeshile.

Njëri nga organizatorët, Othon Jakovidis, siç raportoi korrespodenti i MIA-s nga Athina, për televizionin grek Skaj i zbuloi planet në rast se, siç thotë: “Qeveria nuk e merr parasysh porosinë të cilën e mori nga protesta dhe nuk i merr parasysh anketat e opinionit publik”.

“Nëse kjo çështje arrin në Kuvend, ndërsa paraprakisht nuk shpallet referendum, ne kërkojmë referendum që të mos arrijë deri në Parlament, por nëse arrin në Parlament, ne të njëjtën ditë do të shpallim grevë 48-orëshe, e cila në vazhdim do të bëhet traditë, nëse nuk plotësohen kërkesat tona, gjegjësisht kërkesat e qytetarëve. Në të njëjtën kohë do t’i bëjmë thirrje popullatës greke për të dalë në Sintagma, për të rrethuar Kuvendin për ta mbrojtur demokracinë dhe Maqedoninë”, thotë për Skaj TV Jakovidis nga lëvizja “Thermaikos ora miden”.

Organizatat nga diaspora greke për më 18 mars kanë paralajmëruar protesta para selisë së KB-së në Nju Jork, ndërsa dje në qytetin e Greqisë, Polikastro u mbajt tubim për Maqedoninë. Qytetarët e mbledhur nga qendra e qytetit, duke brohoritu “Maqedonia greke”; “Aleksandër ti jeton, ti na udhëzon”; “Popullata nuk harron, i var tradhtarët”, provuan që të depërtojnë në kufirin me Maqedoninë, megjithatë u ndaluan nga policia. Pas disa incidenteve të vogla, pasi që një pjesë e protestuesve u përpoqën të përçanin bllokun e policisë, qytetarët nuk e arritën qëllimin e tyre, kalimin kufitar dhe më pas u kthyen prapa.

Kontesti 25 vjeçar

Ndryshe, Greqia dhe Maqedonia kanë çështje të hapur për emrin që nga pavarësimi i Maqedonisë në vitin 1991. Në vitin 1995, Kombet e Bashkuara u bënë ndërmjetës në zgjidhjen e emrit duke dërguar person special si mediator. Deri më sot, ndërmjetësimi nuk ka sukses. Greqia pretendon se shteti i Maqedonisë është duke e përdorur emrin e regjionit verior grek i cili mban emrin Maqedoni, përcjellë Portalb.mk.

Greqi – Maqedoni

Megjithatë, pas ardhjes në pushtet të Zoran Zaevit, kjo çështje është riaktualizuar duke rifilluar bisedimet për kontest. Pas një takimi të kryeministrave të Maqedonisë dhe Greqisë në Davos të Zvicrës, Zaev, njoftoi se Maqedonia ka vendosur që t’i ndryshojë emrat e autostradës dhe aeroportit të cilët e mbajnë emrin e figurës së kontestuar nga pala greke – Aleksandri i Maqedonisë. Me vendim të Qeverisë, autostrada u riemërua në “Miqësia”, ndërkaq aeroporti në “Aeroporti i Shkupit”.

Greqia kërkon që Maqedonia ta ndryshojë emrin, me një emër pa përkthim, por edhe ta ndryshojë Kushtetutën, ndërkaq nga ana tjetër, Maqedonia kërkon që emrit aktual t’i shtojë mbiemër të përkthyeshëm, dhe të mos e ndërrojë Kushtetutën. Prej 5 propozimeve që u përfolën në opinionin, dy prej propozimeve më serioze për emrin e Maqedonisë janë: Maqedonia e Epërme dhe Maqedonia Veriore.

Bisedimet vazhdojnë, në nivel ministrash, me ndërmjetësim të të dërguarit special të OKB-së, Methju Nimic.

Shpresat për integrim të Maqedonisë në NATO dhe BE, janë gjithnjë më të fuqishme, duke pasur parasysh se sinjalet e Komisionit Evropian janë se Maqedonia do ta rimerr rekomandimin për fillimin e bisedimeve hyrëse për anëtarësim në BE. Kjo u vërtetua edhe me publikimin e Strategjisë së KE-së për anëtarësimin e vendeve ballkanike në BE, por edhe nga kryetari i Komisionit Evropian, Zhan Klod Junker, i cili në javën e fundit të shkurtit ishte për vizitë në Shkup. Edhe pse, Junker tha se nuk mund të japë datë për fillimin e bisedimeve, megjithatë, shtoi se Maqedonia është në rrugë të drejtë. Megjithatë, përveç menjanimit të kontestit për emrin me Greqinë, që të anëtarësohet në BE, Maqedonia duhet të punojë edhe në sundimin e ligjit, rritjen e ekonomisë dhe konkurrencës, zhvillimin e arsimit dhe sigurisë si dhe komunikimin digjital.