Eurodeputeti Kukan: Ky vit është vit i premtimeve të mëdha për zgjerim të familjes evropiane
Jo vetëm shtetet e rajonit, por edhe vendet anëtare të Bashkimit Evropian janë të sigurta për zgjerimin e BE-së, theksoi në Konferencën e sotme të Komisioneve Parlamentare për Çështje Evropiane në Kuvend, eurodeputeti Eduar Kukan, transmeton Portalb.mk.
“Të gjitha mbledhjet në periudhën e fundit konfirmojnë se Ballkani Perëndimor është në mendjen tonë. Ky vit është vit i premtimeve të mëdha për zgjerim të familjes evropiane. Kriteret e Kopenhages janë themeluar për hyrje në BE, edhe pse ndonjëherë i kemi harruar. Marrëdhëniet bilaterale mund t’i ngadalësojnë integrimet, por ne duhet t’i përkrahim përmirësimet e të njëjtave. Vitet e kaluara kemi punuar që të përmirësohen këto marrëdhënie. Shpresoj se kjo mbledhje do të bëjë progres në bashkëpunimet parlamentare”, theksoi eurodeputeti Kukan.
Ndryshe, në Kuvendin e Republikës së Maqedonisë mbahet Konferenca e 13-të e Komisioneve parlamentare për çështje dhe integrime evropiane të shteteve të përfshira me procesin për stabilizim dhe asocim nga EJL – Cosap. Folës të ftuar të konferencës janë edhe treshja e eurodeputetëve Ivo Vajgëll, Knut Flekeshtajn dhe Eduard Kukan.
Konferenca ka dy sesione, për Perspektivat Evropiane të Ballkanit Perëndimor dhe për sundimin e së drejtës në Ballkanin Perëndimor.
Si folës mysafir në sesionet janë eurodeputetët dhe euro ambasadori Samuel Zhbogar, Kristian Vigenin, kryetar i Komisionit për çështje evropiane dhe kontrolle të Fondeve Evropiane, ambasadori i SHBA-së në Maqedoni Xhes Bejli, si dhe ministrat e Punëve të Jashtme dhe Drejtësisë, Nikolla Dimitrov dhe Bylent Saliji.
Organizator është Komisioni parlamentar për çështje evropiane. Kryetari i Komisionit Artan Grubi thotë se konferenca bëhet mes periudhës së publikimit të Strategjisë për Ballkanin Perëndimor nga KE-ja, pas vizitës së presidentit të BE-së Zhan – Klod Junker në Maqedoni që të bëhet një lloj presioni që Maqedonia të marrë raport pozitiv për përparimin dhe rekomandim të pastër për fillim të bisedimeve për anëtarësim në BE.