Maqedoni, u hoqën tabelat e autostradës me emrin “Aleksandri i Madh”
NP “Rrugët e Maqedonisë” në terren i hoqën tabelat e komunikacionit me emrin e deritanishëm të autostradës “Aleksandri i Madh” në Korridorin 10, ato tabela sipas vendimit të Qeverisë duhet të zëvendësohen me të reja që do ta mbajnë emrin “Miqësia”.
Nga ndërmarrja publike për rrugë shtetërore informojnë se veçmë i kanë porositur 19-të tabelat e komunikacionit me emrin e ri. Furnizimi i tabelave të reja do të kushtojë 4.940.000 denarë.
Me vendimin e Qeverisë, emër të ri mori edhe aeroporti i Shkupit, por ende nuk ka informata zyrtare konkrete për procedurën e ndërrimit të emrit “Aleksandri i Madh” në “Aeroporti Ndërkombëtar Shkup”.
“E ndjekim zhvillimin e ngjarjeve. Kur të marrim instruksione detajore nga Qeveria, për kryerjen e Vendimit, do të veprojmë sipas tre instruksioneve. Sipas instruksioneve do të rrjedhë edhe procedura për ndryshim të shenjës me emrin e aeroportit, që është aktivitet i cili do të kërkojë realizimin e procedurave teknike adekuate, para se të ndodhë vetë faktori i ndryshimit”, informuan kohë më parë nga TAV, koncesioneri i aeroporteve të Maqedonisë.
Vendimi për riemërimin e autostradës dhe të aeroportit hyri në fuqi në datën 14 të këtij muaji, prej se ishte publikuar në “Gazetën zyrtare”.
Ndryshimi i emrave të autostradës dhe aeroportit, ashtu siç publikoi kryeministri Zoran Zaev pas takimit në Davos me homologun e tij grek Aleksis Cipras, është në shenjë të vullnetit të mirë dhe përmirësimit të marrëdhënieve me Greqinë.
Emri i deritanishëm i autostradës “Aleksandri i Madh” përdoret që nga korriku i vitit 2008, ndërsa kjo ishte përcaktuar me vendimin e Qeverisë paraprake.
Nga dhjetori i vitit 2006, sërish, gjithashtu me vendim të Qeverisë paraprake, aeroporti i Shkupit e mori emrin “Aleksandri i Madh”.
Maqedoni, ka hyrë në fuqi vendimi për riemërimin e autostradës dhe aeroportit
Zaev-Cipras: Maqedonia do ta ndryshojë emrin e aeroportit dhe autostradës (VIDEO)
