Shfaqja “G” e Teatrit Shqiptar Shkup rrëmbeu tre çmime në Festivalin “Talia e Flakës”

Shfaqja “G” në regji të Sulejman Rushiti, që së fundmi ishte pjesë e Festivalit “Talia e Flakës” në Gjilan të Kosovës do të kthehet në Shkup me tre çmime, njofton Portalb.mk.

Çmimet që u dhanë për shfaqjen “G” janë të kategorisë ‘shfaqja më e mirë’, ‘regjia më e mirë’ për regjisorin Sulejman Rushiti dhe ‘aktorja më e mirë në rol dytësor’ për aktoren Vjollca Bekteshi Hamiti.

Përndryshe, tre çmimet e sotme, bënë që shfaqja “G”, në shportën e vlerësimeve të sigurojë pesë çmime. Paraprakisht ajo ka marrë çmimin ‘shfaqja më e mirë’ dhe ‘aktori më i mirë’ me Fisnik Zeqirin në Festivalin Teatror në Ferizaj.

Përndryshe, shfaqja “G” sipas vargjeve satirike në regji të Sulejman Rushitit shpalos problemet e keqqeverisjes, politikanëve të padenjë për veten dhe shoqërinë, trajton fenomenin e emërimeve të funksionarëve shtetëror në baza farefisnore dhe miqësore, problemin ku drejtorët e shkollave nuk dinë shkrim e lexim a kurse bartin funksion të rëndësishëm arsimor.

Shfaqja “G” sjellë edhe gruan e cila me sinqeritetin e saj përpiqet të ndërgjegjësojë politikanët. Përfshihet edhe atdhedashuria e cila del nga identiteti fals.

Të gjitha këto fenomene shoqërore shfaqen para publikut me lojën e aktorëve: Adem Karaga, Genci Mirzo, Blerim Dardhishta, Fisnik Zeqiri, Dritëro Agolli si dhe dy aktoreve Vjollca Bekteshi Hamiti dhe Aida Elezi.