Lindja e një dragoi
E ëma në ëndërr pa dragua,
me trup të madh sa qe vetë Epiri
fluturimthi, shqiponjë do ishte në Krua
tragjedi për armiq, do thoshte Eskili
Profetët vetë na parathanë,
në libra të shenjtë mandej u shkrua
nga qielli në tokë sikur Isanë
Zoti do zbriste për shpëtimtar dragua
Apolloni parë kishte në vegimet e tij
stërnipin e Kadmit dhe Harmonisë
mandej urdhëroi mbretin e tij
të ngrinte kështjellë në dheun e Ilirisë
Dhe kështu lindi i biri i Gjonit
ngase deshte dhe vetë Perëndia
emrin pati Gjergj, nga fisi i Kastriotit
me shpirtin e tij do të lindte Shqipëria
Naim Iljazi
