Shkon 1.5 metër niveli i ujit, ushtria shpëton 13 persona në Kamëz, zjarrfikësja nën ujë (Video)
Moti i përkeqësuar ka rënduar situatën në disa vende të Shqipërisë. Gjendja paraqitet e vështirë në Valias, ku 13 persona kanë mbetur të bllokuar në mes të ujit, njofton Ballkanweb.
Edhe zjarrfikësja që shkoi t’i shpëtonte banorët ka mbetur e bllokuar në ujë. Mësohet se niveli i ujit ka arritur në 1.5 metra. Forcat e Armatosura kanë mundur të shpëtojnë të bllokuarit dhe punonjësit e zjarrfikëses.
Mes të bllokuarve në 10 banesa ishin dhe 4 fëmijë dhe 3 punonjës të zjarrfikëses. Në vendgjarje ka shkuar edhe Shefi Shtabit te Pergjithshem te Forcave te Armatosura, Bardhyl Kollcaku. Po kështu e Ministrja e Mbrojtjes Olta Xhaçka ka dalë në terren.
Përmbytjet kanë sjellë probleme të shumta në Tiranë, ku autostrada Tiranë-Durrës është përmbytur dhe qarkullimi është devijuar në rrugë kryesore. Për shkak të përmbytjes së nënstacionit të Kasharit autostrada ka mbetur pa energji elektrike.
