Aktivitetet shtetërore për shënimin e 109-vjetorit të Ditës së Alfabetit

Nën patronazhin e zëvendëskryeministrit të angazhuar për zbatimin e Marrëveshjes së Ohrit Hazbi Lika do të shënohet 109-vjetori i Kongresit të Alfabetit.

Lika në takimin me gazetarët njoftoi se manifestimet kryesore të shënimit të kësaj date të rëndësishme do të mbahen në Shkup dhe Manastir, transmeton MIA. 

Në Shkup do të mbahet akademi solemne për doajenët e arsimit shqip, e cila për herë të parë mbahet me nismë të Qeverisë.

Sipas axhendës, njoftoi ai, ngjarja kryesore është në Manastir më 22 nëntor, ku do të mbahet edhe koncert solemn tradicional, ndërsa në vazhdën e këtyre aktiviteteve me 21 nëntor në Manastir do të mbahet tribunë shkencore bashkë me Institutin për Trashëgimi Kulturore dhe Shpirtërore të Shqiptarëve të Maqedonisë në të cilën do të marrin pjesë akademikë dhe gjuhëtarë nga të gjithë trojet shqiptare.

Zëvendëskryeministri Lika njoftoi se janë marrë masa konkrete për revitalizimin dhe mirëmbajtjen e Muzeut, ku është parashikuar pastrimi i objektit të muzeut, përkatësisht dy lokalet që kanë qenë pjesë e tij dhe të kthehen në pronë të muzeut të alfabetit.