“Forbs”: Merkel është gruaja më me ndikim në botë
Kancelarja gjermane Angela Merkel, për të shtatin vit me radhë është shpallur si gruaja më me ndikim sipas klasifikimit të revistës “Forbs” që u publikua sot.
Në vendin e dytë është kryeministrja britanike Tereza Mej. Vitin e kaluar vendin e dytë e fitoi ish-sekretarja amerikane e shtetit Hillari Klinton.
Në vendin e tretë është Melinda Gejts, bashkëshortja e themeluesit të kompanisë “Majkrosoft” Bill Gejts.
Në listën e dhjetë grave më me ndikim në botë për këtë vit theksohen: Sheril Sandborg, drejtoresha ekzekutive e Fejsbukut, shefja e kompanisë “Xheneral motors”, Meri Bara, Suzan Vojçiçki – drejtoreshë ekzekutive e JuTjub, Abigejl Xhonson – shefe e kompanisë investuese “Fideliti investment”, Kristin Lagard, shefe e Fondit valutor ndërkombëtar, Ana Patrisa Botin – shefe e holdingut “Santader grup” dhe Xhini Rometi – shefe e Aj-Bi-Em.
