Çka na pret pas zgjedhjeve: Ligji për gjuhët, ambasadorë të rinj, gjykatës kushtetues…

S. B. 10:13, 31-10-2017

Kuvendi, Qeveria, presidenti i shtetit dhe institucionet gjyqësore pas mbarimit të zgjedhjeve lokale duhet të vazhdojnë me zgjidhjen e çështjeve “të nxehta”, që u vendosën në pauzë për shkak zgjedhjeve, njofton Portalb.mk.

Bëhet fjalë për zgjidhje kadrovike në institucionet më të rëndësishme, zgjidhjet e ndjeshme ligjore, ekipimi i institucioneve, por edhe çështjet e jashtme-politike, për integrimin euro-atlantik në Maqedoni.

Ja çfarë na pret në periudhën në vazhdim:

Kuvendi:

Duhet të miratohet ligji për përdorimin e gjuhëve;
Të votohet për interpelancën për ministrat, Milla Caroska, Robert Allagjozovski, Sadulla Duraku, Dragan Tevdovski dhe Lupço Nikollovski. Kërkesat për interpelancë i kanë dorëzuar grupet e deputetëve të opozitares VMRO-DPMNE-së. Interpelancë ka edhe për ministrin e Shëndetësisë, Arben Taravari, por pas zgjedhjeve të rrethit të dytë, ai u bë kryetar i Komunës së Gostivarit;
Të konstatohen dorëheqjet e deputetëve të cilët janë kandiduar për zgjedhje lokale dhe kanë marrë funksion të kryetarit të komunës dhe t’i verifikojnë mandatet e anëtarëve të rinj të Kuvendit të cilët duhet të ulen në vendin e tyre;
Të emërohet prokurori i ri shtetëror, pas shkarkimit të Marko Zvërlevskit. Për momentin, procedura është në Këshillin e Prokurorëve Publik, të cilët duhet ta tregojnë qëndrimin e tyre për kandidatët e paraqitur;
Të ratifikohet Marrëveshja për Fqinjësi të mirë mes Maqedonisë dhe Bullgarisë, që kryeministrat e dy shteteve, Zoran Zaev dhe Bojko Borisov, që e nënshkruan më 1 gusht.

Qeveria:

Të emërohet ministër i ri i Shëndetësisë në vend të Arben Taravarit dhe ministër Pa Resor për Investime të Huaja në vend të kryetarit të ri të Strugës, Ramiz Merko, transmeton Portalb.mk.
Të emërohen drejtorë në institucione shtetërore, ndërmarrje publike dhe shoqëri aksionare të cilat janë në pronësi të shtetit, pasi që shumica e ndryshimeve kadrovike që Qeveria më parë i ka bërë, janë me mandat ushtrues detyre.

Presidenti Gjorge Ivanov:

Presidenti duhet të vazhdojë me procedurën për zgjedhjen e trashëgimtarëve të gjykatësve kushtetues Natasha Gaber – Damjanovska, Gëzime Starova dhe Ismail Dardhishta të cilëve u ka mbaruar mandati. Ata i emëron Kuvendi. Kabineti i Ivanovit ka thënë se presidenti do të dorëzojë propozim deri te Kuvendi pas mbarimit të zgjedhjeve lokale.
Duhet të plotësohen vendet e zbrazura të ambasadorëve në disa shtete.

MPB:

MPB duhet ta mbarojë procedurën pas shpalljes për pranim të 500 policëve të rinj. Shpallja u bë në fillim të gushtit, ndërkaq procedura u la në pauzë për shkak zgjedhjeve lokale.