PPE, për “Tahirin”: Jo presion Prokurorisë
“Kryeministri Edi Rama dhe mazhoranca qeverisëse duhet të ndalin menjëherë presionin politik ndaj prokurorisë dhe duhet të përdorin të gjithë instrumentet e tyre politikë për të mbrojtur drejtësinë në vend”.
Mesazhi vjen nga Partia Popullore Europiane, që përmes një mesazhi bën të ditur se ka ndjekur të gjithë situatën politike në vend për çështjen “Tahiri”, ndërsa flet qartë për presionin e krijuar ndaj Prokurorisë, pasi Krimet e Rënda i kërkuan Parlamentit heqjen e imunitetit për ish-ministrin e Brendshëm, Saimir Tahiri, për ta hetuar atë për 2 akuzat ngritura, korrupsion dhe trafik droge, njofton Top Channel.
Pavarësisht kësaj kërkesë, vijon në deklaratën e saj Partia Popullore Europiane, Partia Socialiste votoi më 25 tetor në Parlament kundër heqjes së plotë të imunitetit për ish-ministrin Tahiri.
PPE thekson gjithashtu mbështetjen për kryetarin e Partisë Demokratike, Lulzim Basha, i cili ka dënuar presionin politik të kryeministrit Rama ndaj Prokurorisë dhe përdorimin e shumicës në Parlament për t’i siguruar Saimir Tahirit mbrojtje politike.
Grupi i Partisë Popullore Europiane nënvijëzon se dekriminalizimi i punonjësve të administratës publike është një hap i rëndësishëm për zhvillimin e kulturës politike në vend dhe se lufta ndaj krimit të organizuar mbetet një çështje thelbësore për Shqipërinë, për angazhimin e saj për sundimin e ligjit, në rrugën drejt integrimit në BE.
