Dauti: Ishim të vetmuar, Aleanca dhe BESA e kishin VMRO-DPMNE-në
“Më lejoni të falënderoj të gjithë ata që me votën e tyre votuan Partinë Demokratike Shqiptare, që janë diku rreth mbi 22.000 mijë votues në nivel republikan, e që me votën e tyre e mbajnë gjallë këtë ide dhe këtë përcaktim”, tha kandidati për kryetar të Komunës së Tetovës nga radhët e PDSH-së, Bardhyl Dauti.
“Në këto zgjedhje ne si parti kemi qenë të vetmuar për dallim nga partitë tjera shqiptare që kanë pasur koalicione me partitë tjera maqedonase. Ndoshta koalicioni i partisë në pushtet nuk është i çuditshëm pasi që koalicioni BDI-LSDM ishte publik, transparent dhe i paralajmëruar, ndërsa koalicioni i fshehtë i BESË-s dhe Aleancës me VMRO-në në komuna të caktuara ishte përcaktuese për rezultatet e këtyre zgjedhjeve”, tha Dauti.
Ai tha se këto koalicione opinion ka mundësi t’i shohë “mjafton të shikojmë rezultatet e zgjedhjeve në Strugë, Dibër, Gostivar, Bogovinë, dhe Negotin-Vrapçisht ku duket qartazi bashkëpunimi i ngushtë mes Aleancës dhe VMRO-së”.
“Po ashtu nëse i shohim rezultatet në komunat: Brvenicë, Tetovë, Tearcë, Saraj, dhe Çair, duket qartë koalicioni BESA – VMRO. Edhe një herë falënderojmë të gjithë votuesit për mbështetjen, rezultati për ne është solid dhe ne do të vazhdojmë të luftojmë për këto vlera që afirmojnë çështjen shqiptare”, tha Dauti.