Zaev: Plani reformues “3-6-9” është proces inkluziv që po zhvillohet me ritëm të përforcuar
Kryeministri dhe lideri i LSDM-s, Zoran Zaev sot realizoi takim me deputetët e Parlamentit Evropian, Ivo Vajgël, Eduard Kukan dhe Knut Flekenshtajn.
Në takimin, siç kumtojnë nga LSDM-ja, u bisedua për gjendjen aktuale politike në Republikën e Maqedonisë në prag të zgjedhjeve lokale, zbatimin e procesit të projektuar reformues, si dhe për politikën e jashtme dhe proceset euroatlantike.
Zaev i informoi eurodeputetët se zbatimi i Planit reformues 3-6-9 është proces inkluziv që po zhvillohet me ritëm të përforcuar dhe se në realizimin e tij tërësisht janë përfshirë të gjitha ministritë.
Në pikëpamje të politikës ndërkombëtare, Zaev potencoi se periudha e kaluar është posaçërisht pozitive në pikëpamje të politikës ndërkombëtare dhe avancimit të marrëdhënieve të Republikës së Maqedonisë me fqinjët.
“Përmes Marrëveshjes për fqinjësi të mirë me Republikën e Bullgarisë dhe me bashkëpunim me të gjithë fqinjët e tjerë, dëshmuam se mundemi vetë t’i zgjedhim çështjet e hapura në dobi të ndërsjellë, pa pritur ndihmë nga ndërmjetësues në procesin e kontraktimit”, potencoi Zaev.
Në prag të zgjedhjeve lokale, Zaev theksoi se pret fitore të LSDM-së dhe koalicionit në zgjedhje lokale korrekte dhe kredibile, rezultati i të cilave në masë të madhe do të përcaktojë drejtimin, në të cilin në të ardhmen do të lëvizë republika e Maqedonisë.
“Besoj se pas zgjedhjeve parlamentare, edhe zgjedhjet lokale do ta dëshmojnë nevojën për karakter multietnik të partive. Zgjedhjet lokale në të cilat presim fitore, do t’i dëshmojnë përfitimet nga koncepti i një shoqërie ku fuqimisht besojmë”, thekson Zaev.
Në takimin, bashkarisht u konkludua se ende ka hapësirë për përparim më të madh në bashkëpunim mes Republikës së Maqedonisë dhe BE-së, e tërë kjo me qëllim të vazhdimit të procesit eurointegrues, që do të rrumbullakësohej me anëtarësim të plotëfuqishëm të Maqedonisë në BE, që është interes kryesor shtetëror dhe kombëtar.