Kallëzim penal për drejtorin e një shkolle fillore në Makedonski Brod për transportim të paligjshëm të nxënësve
Drejtori i shkollës fillore “Sveti Kliment Ohridsi” në Makedonski Brod është i dyshuar për keqpërdorimin të detyrës dhe autorizimit zyrtar dhe se në periudhën prej vitit 2011 deri 2016-të ka organizuar udhëtim të paligjshëm të nxënësve, njofton Portalb.mk.
Kundër 54-tër vjeçarit T.S është ngritur kallëzim penal dhe akuzohet se e ka dëmtuar buxhetin e shkollës për pothuajse 40.000 euro.
Siç kumtojnë nga Ministria e Punëve të Brendshme raportet financiare të shkollës tregojnë se fondet e udhëtimit të nxënësve janë rritur në mënyrë drastike nga e nevojshmja.
“Në financimet vjetore planet e shpenzimeve për shërbimet e udhëtimeve në arsimim, drejtori ka parashikuar shuma më të mëdha të mjeteve me para me të cilat i ka mbuluar harxhimet për udhëtimin e organizuar në mënyrë joligjore”, thonë nga MPB-ja.
Sipas MPB-së gjatë organizimit të udhëtimit drejtori si person i autorizuar e ka shkelur ligjin për furnizime publike dhe ligjin për transportin rrugor. Një pjesë e nxënësve kanë udhëtuar me kombi që janë në pronësi të shkollës dhe një pjesë tjetër me kombit e shkollës së mesme “Sveti Naum Ohridski” nga Makedonski Brod, por të dy shkollat nuk kanë pasur leje përkatëse për udhëtim të linjës së caktuar dhe për udhëtim të nxënësve.