Shqipëri, Deputeti përplas për vdekje 53-vjeçarin
Deputeti i PDIU-së Aqif Rakipi është përfshirë në një aksident me pasojë vdekjen në orët e para të mëngjesit të së shtunës, transmeton Top Channel.
Ngjarja ka ndodhur rreth orës 4.41 në aksin interurban Vorë-Tiranë, në afërsi të mbikalimit të kthesës së Kamzës, përballë tregut ushqimor.
Sipas policisë deputeti ka shkuar vetë në komisariat me mjetin e tij ku ka deklaruar se ka përplasur një person në autostradë.
Gjatë hetimeve në vendin e ngjarjes dhe gjatë kryerjes së veprimeve, u njoftua Prokurori i Rrethit Gjyqësor Tiranë, i cili pasi u informua për rrethanat dhe veprimet e para, kërkoi që krahas Ekspertit autoteknik të Policisë, të caktoheshin edhe dy ekspertë të tjerë autoteknik të jashtëm, me qellim kryerjen e një ekspertimi autoteknik me grup ekspertësh.
Grupi hetimor po punon për zbardhjen e plotë të rrethanave dhe shkaqeve që shkaktuan aksidentin rrugor me pasojë vdekjen e kembesorit S.S., rreth 53 vjeç.
