Kadriu: UEJL ka nevojë për një menaxhim më të mirë
Në vigjilje të përzgjedhjes së Rektorit të ri të Universitetit të Evropës Juglindore, Portalb realizoi intervistë me njërin nga kadidatët për këtë titull, shefin e degës së Gjuhës dhe Letërsisë Shqipe në fakultetin e Gjuhëve Kulturave dhe Komunikimit, Zeqir Kadriu.
Ai është kundërkandidat i rektorit aktual që garon sërish për këtë pozitë, Zamir Dika, i cili nuk iu përgjigj ftesës së redaksisë tonë për të realizuar intervistë me të.
Kush është Zeqir Kadriu, një përshkrim i shkurtër i biografisë.
Zeqir Kadriu përpos që është shef i degës së FGJKK, ai ka gjashtëmbëdhjetë vjet përvojë pune në universitet, ( katër vjet në USHT dhe dymbëdhjetë vite në UEJL). Ai ka përvojë e veçantë në universitetet simotra në Edirne- Turqi ( Qendra e Gjuhëve Ballkanike) dhe shkëmbim përvojash për mësim periodik në Shqipëri, Kosovë dhe Maqedoni. Ai ka qenë demonstrator në kuadër të Ministrisë së Arsimit dhe Shkencës në RM, koordinator për certifikimin e drejtorëve të shkollave fillore dhe të mesme me mësim në gjuhën shqipe në RM. Kadriu ishte moderator për Modulin-4, Drejtori si udhëheqës pedagogjik, pranë Qendrës për certifikimin e drejtorëve. Zv/ drejtor në Byronë për Zhvillimin e Arsimit në vitin 1998-2001. Ai ishte këshilltar Republikan për gjuhë dhe letërsi shqipe në kuadër të Byrosë për Zhvillimin e Arsimit. Ka ushtruar detyrën e drejtorit në shkollën fillore- PashkoVasa në fshatin Grupçin (1992-1994) dhe ka përvojë trembëdhjetëvjeçare përfshi këtu edhe në arsimin fillor e të mesëm si profesor i Gjuhës dhe Letërsisë Shqipe.
PORTALB: Na tregoni si shkon dhe deri ku ka arritur procedura e zgjedhjes së rektorit të ardhshëm të UEJL-së?
ZEQIR KADRIU: Procedura e zgjedhjes së Rektorit të UEJL-së është një praktik e rregullt që sipas rregullores kryhet në çdo katër vite. Konkursi ka qenë i rregullt por intern brendapërbrenda UEJL-së dhe është hapur që në muajin mars. Gjer më tani, sipas rregullores ka kaluar nëpër disa shkallë, fillimisht kryetari i Bordit zot. Dennis Farrington ka realizuar nga një intervistë me dy kandidatët konkurrent zot. Zamir Dika dhe zot. Zeqir Kadriu. Pas intervistës kandidatët kanë pasur për obligim të hartojnë një plan strategjik për vizionin e tyre rreth zhvillimit të universitetit, gjegjësisht strategjisë së UEJL-së në katër vitet e ardhshme. Pas përpilimit të strategjisë nga kandidatët, sipas procedurës është dashur që kopje ti dërgohet gjithsecilit prej anëtarëve të Bordit dhe pastaj procedura ka kaluar për informatë tek të gjithë Senatorët e UEJL-së,përfaqësues nga të pesë fakultetet.
Më datë 8 prill të dy kandidatët konkurrentë kanë shpalosur programet e tyre në formë praktike dhe vizuale pranë Senatit të Universitetit të Evropës Jug-Lindore, me ç rast gjithsecilit nga senatorët i është dhënë mundësia që të pyes kandidatët konkurrent për strategjinë dhe vizionin e tyre, dhe për zhvillimin e mëtejmë të UEJL-së. Tani, sipas rregullores të dy konkurrentët vazhdojnë garën e mëtejme e cila i përcillet si informacion Bordit të UEJL-së. Sa për informacion Bordi i universitetit përbëhet nga tre anëtarë të brendshëm, tre të jashtëm dhe tre ndërkombëtar. Sipas procedurës pas një interviste të sërishme mbetet që të bëhet mbledhja e anëtarëve të Bordit për të vendosur se kush do të jetë në të ardhmen Rektor i UEJL-së.
PORTALB: Pse vendosët të konkurroni për rektor?
ZEQIR KADRIU: Konkurrimi im pati për qëllim që të begatoj në rradhë të parë procesin demokratik në institucionin e quajtur Universiteti i Evropës Jug-Lindore; për të cilin opinioni e njeh si një institucion “ privat-publik” i themeluar nga viti 2001 me pretekst të veçantë për arsimimin e lartë të shqiptarëve në Maqedoni dhe rajon gjithnjë me mësim në gjuhën shqipe.
Ky dedikim, që aso kohe u themelua në Tetovë ishte një shembull i mirë për të gjithë opinionin arsimdashës dhe u krijua me fondacione të përbashkëta disa shteteve të Evropës Perëndimore dhe Shteteve të Bashkuar të Amerikës nga Komisari i lartë asokohe i OSBE-së i njohur me emrin Maks Va Der Shtul. Edhe sot, në qarqe të ndryshme ky Universitet njihet me nofkën Universiteti i Shtulit. Ky ogur i mirë u themelua në periferi të Tetovës në një sipërfaqe prej 34 hektarësh dhe u investuan afro 65.milion euro, në një kopsht mollësh ,që sot është një copë evropë ku zhvillohet mësim bashkëkohor në tri cikle të arsimit të lartë; Bachelor, Master dhe Shkollë Doktorale.
Ky shembull i mirë edhe sot e kësaj dite është një parametër i krahasueshëm me shumë universitete bashkëkohore private që janë themeluar në vitet e demokracisë në evropë me qëllim të ngitjes së cilësisë dhe arsimit të lartë sipëror. Disa vite rresht ky institucion pati një gamë suksesesh dhe një përzgjedhje elite e cila kohët e fundit po e humbet kuptimin. Kjo ndodh për vetë faktin që vitet e fundit vazhdimisht vjen duke rënë numri i studentëve që regjistrohen dhe njëkohësisht mungon kapaciteti i studentëve gjegjësisht nxënësve të shkëlqyeshëm që janë gjithnjë e më pak të pranishëm në dyert e këtij universiteti.
Arsye tjetër është se vazhdon të mos jetë prania e kuadrove elitë të cilët ishin mësimdhënës me përvojë para ca vitesh. Kapacitetet e shumta të shtëpive të studentëve dhe kapacitetet e tjera ekonomike ( infrastruktura e brendshme e qytezës universitare ) mbetet edhe më tej më pak se 50% e shfrytëzuar si rezultat i menaxhimit joefikas për të cilin mendoj se ende ka hapsirë për tu përmirësuar .
Kostoja e lartë e taksave të studentëve si dhe mungesa e një selektimi pozitive për pranimin e studentëve mbeten edhe më tutje sfidë për Universitetin e Evropës Jug-Lindore. Këto në pika të shkurta ishin arsyet që unë mora vednim të jem kandidat i mundshëm për rektor. Në një farë mëmyre kujtoj që kam begatuar procesin demokratik i cili në vija të holla mund të rifiguronte si një monizëm i kohëve të shkuara.
PORTALB: Po a u krijuan kushte që kjo të mos ishte ashtu.. ?
ZEQIR KADRIU: Për fat të keq jo! Jo vetëm që nuk u krijuan kushte por përkundrazi procesi të lente përshtypjen e një konkursi të bërë nën hije që aspak nuk i ngjasonte një institucioni me themele demokratike, dhe me shpirt human për të cilin edhe ishte themeluar. Sidoqoftë, kam bindjen që kam thyer tabu-temën e një zinxhiri që më shumë se kaq len përshtypje interesash grupore e jo kolektive!
PORTALB: Mendoni se UEJL ka nevojë për ndryshime rrënjësore?
ZEQIR KADRIU: Gjithsesi që ka shumë hapësirë për të bërë ndryshime. Bile edhe ndryshime rrënjësore. Arsyet janë të shumta dhe unë shpresoj dhe jam i bindur që kam kapacitete intelektuale dhe profesionale për ta menaxhuar këtë institucion ashtu siç është më së miri. Vazhdoj të mbaj bindjen se me punë dhe përkushtim më serioz, gjërat mund të ndryshojnë për së mbari. Unë e kam të qartë se sot çka kërkon dhe sa është kapaciteti i ekonomisë së tregut në RM. E di po ashtu se një menaxhim i mirë kërkon jo vetëm firmosje kontratash formale në letër por edhe menaxhim me shumë struktura të nevojshme e relevante të kapaciteteve shoqërore e private në vend. Jam shumë i bindur se me një dhe dy kapacitete me të cilat është bërë kontrata formale, nuk i ndihmohet as studentëve e as nuk ngritet imazhi i të pesë fakulteteve në kuadër të UEJL-së. Në këtë drejtim lypset më shumë.
Shpresoj se ka mundësi kjo punë të menaxhohet më ndryshe duke i vënë në funksion të plotë kapacitetet intelektuale dhe afinitetet e mirëfillta të studentëve me cilësi për të pushtuar edhe tregun më të gjerë jo vetëm në vend por edhe në rajon edhe më gjerë. Për këtë kam vizion shumë të qartë dhe ma merr mendja se si mund të arrihet. Kam pasur rast edhe më herët të udhëheq dy institucione relevante arsimore dhe kam arritur sukses maksimal. Jam shumë optimist se edhe në këtë rast mund të ndihmoj shumë nëse më jepet mundësia.
PORTALB: Si e vlerësoni punën e deritanishme të kundër-kandidatit tuaj, gjegjësisht z.Dika?
ZEQIR KADRIU: Më pak do të doja të flas për pyetjen që më parashtroni. Por meqë po më shtroni këtë pyetje do them shkurt dy fjalë:
Profesor Zamir Dika është një kuadër ambicioz dhe pati rastin të jetë që nga themelimi njëri ndër kuadrot më të ri i cili pati dy herë postin e zv/ rektorit dhe tani rektor i universitetit katër vitet e fundit. Në letër kemi të shkruara shumë gjëra të mira e pozitive, në praktikë të bëra shumë pak! Përvoja e tij duhet të jepte më shumë rezultate në sferën e menaxhimit. Kujtoj që do të ishte më mirë që të vinte në funksion së paku gjysmën e atyre gjërave që i kemi lexuar në letër. Përvoja ime në rastin konkret dallon nga e tija sepse unë fillimin dhe vijimin e kam të shkallëshkallshëm në procesin arsimor –edukativ.
Kamë shumë mundësi të ndihmoj në menaxhimin e resurseve arsimore pas trajnimeve të bëra me përkushtim në Londër, Paris dhe Rimini (Itali) për të cilat nuk më është dhënë rasti t,i vë në praktik!
PORTALB: Mendoni se arsimi i lartë në Maqedoni ka mungesë të kuadrove kualitative?
ZEQIR KADRIU: Universitetet me mësim në gjuhën shqipe në RM, janë relativisht me një përvojë të shkurtër. Është e vërtetë se për kaq kohë është e pamundur të kishim më shumë se kaq rezultate. Unë dhe shumëkush jemi të vetëdijshëm se punët e mëdha dhe kualitative kërkojnë mund, kohë dhe sakrifica. Kuadrot e tanishme shqiptare në një masë të madhe këtë janë edhe duke e bërë; hiq këtu ca elemente turbulluese që në këto dy institucione kanë ardhur në prizmin e nepotizmit dhe familjarizimit të theksuar që ulin shumë poshtë imazhin e vet universitetit. Kjo çështje pas kaq kohësh do të duhej reviduar me një strategji e cila do të përmbante cilësi dhe vetëm cilësi. Ne sot kemi nevojë për kualitet nga se kuantitet kemi mjaft! Besoj se ka shumë mundësi që kuadrot e reja me vlerat e tyre cilësore do të jenë i vetmi mekanizëm që do të zëvendësonin me përparësi duke sjell edhe trurin inteligjent i cili në një farë forme largohet nga vendi sepse; fatkeqësisht vendin e tyre e zënë kuazi-kuadrot që kanë linqet e tyre të shumta dhe pa meritë vihen në vende të rëndësishme , që të len përshtypjen e një politike kadrovike që nuk ka shpresë. Kjo shumë keq ndikon edhe tek opinioni i cili në një mënyrë i ka ende të freskëta abuzimet e kësaj natyre. Kjo është një nga komponentet që në vend që të shtohet numri i regjistrimit të studentëve, për fat të keq,numrat na dalin, pak e më pak. Edhe për këtë kam një çelës shumë praktik se si mund të zgjidhet!
PORTALB: Edhe pse shumica e të rinjve kryejnë madje dhe magjistratura mbeten të papunë, ku është problemi sipas jush?
ZEQIR KADRIU: Në kuadër të Universitetit të Evropës Jug-Lindore, ekziston Qendra e Zhvillimit të Karrierës! Këtë për fat të mirë e kemi të zgjidhur më mirë se kushdo tjetër. Përmes kësaj qendre vendoset linku, që më së lehti studentët e cikleve të ndryshme të vijnë deri tek vendi i punës. Mirëpo, fatkeqësisht kapacitetet ekonomike dhe institucionet tjera relevante janë të pakta për t,i thithur apo pranuar kuadrot që dalin me shumicë edhe nga institucione të tjera; hiq këtu edhe format abuzive të cilat nuk janë të pakta në shumë institucione shtetërore për selektim pozitiv të kuadrove.
UEJL-ja këtë formë e ka menaxhuar më së miri duke krijuar edhe marrëdhënie bashkëpunimi për pranimin e kuadrove të tilla ( me cilësi më të lartë) edhe nga marrëveshjet me ndërmarrje private-publike por edhe me institucione relevante shtetërore. Kjo që të jemi korrekt është me shumë përkushtim , por në këtë drejtim janë hasur edhe vështirësi nga vetë institucionet të cilat për fat të keq janë të politizuara tej mase. Kjo edhe për vetë faktin që, edhe vlerësimi i Shangait cilësinë dhe kualitetet e UEJL-së e radhiti në vendit e dytë, sado që ishin shumë të vetëdijshëm që ky universitet duhej të ishte në vendin e parë. Kjo u bë me qëllim që universiteti “Kirili dhe Metodi” edhe pse sipas këtyre kritereve dihej ku e ka vendin përsëri u radhit me pa të drejtë në vendin e parë.
PORTALB: Mesazhi juaj për studentët e Maqedonisë?
ZEQIR KADRIU: Studentët në RM kanë një shanse të mirë që të regjistrohen në UEJL. Ky universitet u mundëson jo vetëm kushte ideale për mësim dhe edukim por edhe cilësi dhe kualitet bashkëkohor në mësimdhënie. Kuadrot aktuale ( me përjashtime), kanë kapacitete të mjaftueshme që studentëve t,u japin dije dhe t,i përgatisin për profesionin e tyre jo vetëm në suaza të rajonit të ngushtë por edhe më gjerë. Unë do tu sugjeroja që në një të ardhme, nëse shikojmë me vizion më të qartë do të kenë hapësirë që afinitetet e tyre ti demonstrojnë edhe në institucionet tjera relevante me cilësi dhe kualitet. Shpresojmë në të ardhmen që 200 studentët e ardhshëm me sukses super të shkëlqyeshëm , të jenë pjesë e këtij institucioni dhe të regjistrohen me kuota- pagesash minimale përmes sistemit kreditor; me
Ç, rast do të ngremë edhe cilësinë e studimit por edhe do të risim peshën dhe vetë imazhin e universitetit. Kjo natyrisht se kërkon edhe punë edhe angazhim maksimal për të rikthyer kapacitetin e besueshmërinë së viteve të mëparshme. Edhe për këtë është gati plani strategjik, por pret që të hapen dyert për një hap të guximshëm, që duhet t’a bëj Bordi i universitetit! /Portalb
