PPD shpalos platformën në fshatrat Rogle dhe Cerovë
Mbrëmë kandidatët për deputet në njësinë zgjedhore 6 të Partisë për Prosperitet Demokratik të kryesuar nga bartësi i listës zgjedhore Muhamed Halili patën takim me banorët dhe simpatizantët e kësaj partie në fshatrat Rogle dhe Cerovë.
Duke shpalosur Platformën parazgjedhore të kësaj partie Muhamed Halili theksoi se Platforma parazgjedhore e Partisë për Prosperitet Demokratik është e fokusuar në këto lëmi:
Zhvillimin ekonomik të rajoneve me popullatë shumicë shqiptare në përgjithësi si dhe rajoneve të lëna jashtë përkujdesjes së shtetit,
Zhvillimin e blegtorisë në rajonet kodrinore- malore , atje ku ka kushte për këtë veprimtari,
Stimulimin e prodhimit të prodhimeve ushqimore me cilësi thjeshtë natyrore pa përdorimin e pesticideve,
Krijimin e sistemit të mbrojtjes sociale sipas modelit skandinav,
Krijimin e sistemit të posaçëm të mbrojtjes shëndetësore
Rritjen e cilësisë së arsimit si nevojë e kohës për bashkëngjitje të trendëve evropiane
Profilizimin profesional të arsimit të mesëm dhe të lartë, etj.
Një pjesë të fjalimit të tij Halili ia kushtoi edhe nevojës për rritjen e investimeve të vendit dhe të huaj në zhvillimin e blegtorisë. Ky shekull, theksoi ai, do të karakterizohet me mungesë të ushqimit në botë prandaj banorët e këtyre rajoneve shansin e kanë të kthehen blegtorisë dhe bujqësisë sepse aty është edhe ardhmëria e tyre.
Duke folur për arsimimin e mesëm dhe sipëror ai theksoi se është domosdoshmëri e kohës shqiptarët ti kthehen rritjes së cilësisë së mësimdhënies sepse në këtë mënyrë do të krijojmë kuadro cilësore të cilat do të kontribuojnë në zhvillimin e shpejtë ekonomik, kulturor, social të shoqërisë shqiptare në përgjithësi.