fbpx

Njohja e Kosovës, moment shumë i veçantë për Greqinë

Shefi i zyrës ndërlidhëse të Greqisë në Kosovë, Dimitris Moschopoulos, ka thënë se mosnjohja e pavarësisë së Kosovës nga ana e Greqisë po ndodhë për disa arsye komplekse.

Mirëpo, sipas tij, njohja, kurdo që të ndodhë, do të jetë një moment shumë i veçantë për Greqinë, ani pse ai nuk përmendi ndonjë datë të mundshme.

“Parashikimi se kur do të ndodhë njohja është njësoj si të parashikohet devalvimi i parasë, gjë që nuk mund të parashikohet”, tha Moschopoulos gjatë një ligjërate në një prej universiteteve të vendit.

Duke folur për integrimet euro-atlantike, Moschopoulos tha se Greqia e mbështetë Kosovën në integrimin e saj në BE, por sipas tij, për të ndodhur një gjë e tillë, Kosova duhet të njihet nga të gjitha shtetet anëtare të BE-së.

Diplomati grek në Kosovë shtoi se shteti i tij ka inkurajuar shtetasit e Greqisë, po ashtu edhe ata të Kosovës, që të ketë liri të lëvizjes në mes të dy vendeve, transmeton koha.

“Tani Greqia vizat për kosovarët do t’i vë në pasaportë edhe pse ende nuk e ka njohur Kosovën. Qytetarët e Kosovës do të kenë lëvizje të lirë me vizat greke në të gjitha vendet e Schengenit, me përjashtim të Spanjës, e cila poashtu nuk e ka njohur Kosovën”, tha ai.

Ai shtoi se Greqia beson në të ardhmen e saj në BE dhe në NATO, duke shprehur mbështetjen e integrimit të gjithë Ballkanit Perëndimor.

Lajme të ngjashme

Back to top button