Azia Lindore, një rajon me rritje të shpejtë ekonomike

Ekonomitë në zhvillim në Azinë Lindore të Paqësorit po rriten në mënyrë të qëndrueshme, pasi mbështeten nga vendet me të ardhura të larta, njoftoi Banka Botërore ditën e hënë. 

Sipas Përditësimit Ekonomik për Azinë Lindore Paqësore, BB parashikoi një rritje të qëndrueshme për ekonomitë e Azisë Lindore, si Kina, Indonezia, Malajzia dhe Tailanda, e nxitur nga rimëkëmbja në vendet me të ardhura të larta.

“Rritja e fuqishme globale e këtij viti do të sjellë rritjen e rajonit me një ritëm relativisht të qëndrueshëm, në përshtatje me kushtet financiare botërore”, tha Axel van Trotsenburg, zëvendës presidenti i BB për Azinë Lindore dhe Rajonin e Paqësorit. 

Raporti vlerësoon se rritja e përgjithshme për ekonomitë në zhvillim në Azinë Lindore do të jetë 7.1% në vitin 2014, duke rezervuar për këto vende titullin e rajonit me rritjen më të shpejtë, pavarësisht ngadalësimit që ka ndodhur, krahasuar me rritjen mesatare prej 8% në vitet 2009-2013.

Megjithatë, raporti paralajmëron se ka ende risqe në rrugën e realizimit të këtyre parashikimeve, si niveli i paparashikuar i interesit global dhe rimëkëmbja e ngadaltë e vendeve me të ardhura të larta. 

Për të ruajtur rritjen dhe besimin tek tregu, BB i këshillon këto vende të rajonit që të rrisin përpjekjet e tyre që reformat strukturore të krijojnë një potencial rritjeje. /Shekulli