fbpx

Ramadani: Nuk do të lejojmë që USHT të përdoret për propagandë politike

Prorektori për çështje arsimore në Universitetin Shtetëror të Tetovës, Fehari Ramadani doli sot para gazetarëve duke thënë se USHT është institucion i lartë arsimor i të gjitha komuniteteve dhe nuk pajtohen në asnjë mënyrq që “emri i këtij institucioni të vetëm të arsimit të lartë në gjuhën shqipe në Republikën e Maqedonisë të shndërrohet në arenë të shfryrjes, larjesh hesapesh dhe përfitimit të ulët politik”.

Reagimi i tillë vjen pas akuzave të Partisë Demokratike Shqiptare se janë harxhuar para të majme në këtë Universitet nga familjarë të liderit të Bashkimit Demokratik për Integrim, Ali Ahmeti.

“Universiteti Shtetëror i Tetovës është institucion i lartë arsimor i të gjitha komuniteteve, që jetojnë në Republikën e Maqedonisë, pa dallim përkatësie etnike, fetare apo politike dhe të gjitha partive politike u dëshirojmë suksese në prag të këtyre zgjedhjeve, por nuk pajtohemi në asnjë mënyrë, që Universiteti Shtetëror i Tetovës të përdoret për reklamë dhe propagandë të politikave ditore, dhe aq më tepër, emri i këtij institucioni të vetëm të arsimit të lartë në gjuhën shqipe në Republikën e Maqedonisë të shndërrohet në arenë të shfryrjes, larjesh hesapesh dhe përfitimit të ulët politik” tha Ramadani, transmeton Portalb.
 
Ramadani më tej tha se nga qershori i vitit 2012, Universiteti Shtetëror i Tetovës ka strukturë të re menaxhuese e cila, sipas tij, tërë kapacitetin e vet ekonomik, akademik dhe intelektual e ka vënë në shërbim të gjeneratave të reja

“Kemi krijuar kushte optimale infrastrukturore dhe akademike, të cilat janë shoqëruar me rezultate evidente në konsolidimin e plotë të kushteve të studimit si: hapjen e objektit të ri universitar në zemër të qytetit të Tetovës, të cilit ia kanë lakmi edhe universitetet më prestigjioze botërore, ngritjen e laboratorëve arsimorë dhe shkencorë, hapjen e fakulteteve dhe programeve të reja studimore në përputhje me kërkesat e tregut, promovimin e vlerave të mirëfillta akademike në rang kombëtar dhe ndërkombëtar, përfitimin nga projektet e ndryshme evropiane në të mirë të komunitetit akademik, ndërkombëtarizimin e universitetit, si dhe investimet kapitale afatgjate që do të pasojnë në të ardhmen për një universitet të moderuar dhe të reformuar në përputhje me të gjitha standardet evropiane”tha Ramadani. /Portalb

Lajme të ngjashme

Back to top button