Të punësuarit e “Jugohromit” nëpërmjet protestës kërkuan të hapet fabrika
Të punësuarit e “Jugohromit” sot e bllokuan rrugën rajonale Shkup-Tetovë, te pika pagesore në Zhenlinë, pasi që janë të pakënaqur që Inspektorati për Mjedis Jetësor ka sjellë vendim që “Jugohrom” të mos punojë edhe për 90 ditë, njofton Portalb.mk.
Nga Sindikata thonë se vendimi ka prapavijë politke, për atë edhe pse kombinati nuk punon, ajri në Tetovë prapë është i ndotur. Ata kërkojnë që Qeveria prapë ta hapë “Jugohromin”.
“Nëse Qeveria nuk e ndryshon vendimin për mbyllje të “Jugohromit”, prej nesër shteti do të ketë edhe 700 tjerë të papunë. Duam t’u dërgojmë porosi disa njerëzve, të cilët kanë ambicie të sëmura politike, ndërkaq fshihen pas disa organizatave joqeveritarel se gjoja po kujdesen për ajrin në Tetovë. Edhe pse “Jugohrom” nuk punon tani, Tetova prapë është e ndotur. Nëse dikush do të bëjë karrierë politike, t’i heqë duartë nga “Jugohromi”. Ekzistojnë parti politike, atje le të bëjnë karrierë politike”, tha kryetari i Sindikatës për Industri, Energjetikë dhe Minierë, Pece Ristevski.
Të punësuarit që sot protestuan thanë se “Jugohrom” është e vetmja ekzistencë e tyre që jetojnë në Komunën e Jegunovcit.
Inspektorati i Ministrisë së Ekologjisë më 1 nëntor të vitit të kaluar vendosi për ndërprerjen e punës në “Jugohrom”, me arsyetimin se kombinati nuk ka vendosur filtrat. Prej kur është mbyllur fabrika, që cilësohen si një ndër ndotësit më të mëdhenj në rajonin e Pollogut, disa herë të punësuarit kanë protestuar me qëllim që fabrika t’i rindezë furrat, ndërkaq ata të kthehen në punë.
