Kush është vogëlushja që shoqëroi Rozanën në skenë
Rozana Radi u shpall fituese e edicionit të 18-të të Festivalit “Kënga Magjike” me këngën e saj të veçantë “Ma thuaj ti”, ajo që la përshtypje përveç tekstit dhe këngës së fuqishme ishte edhe vogëlushja që e shoqëroi atë në skenë.
Që nga paraqitja e parë e këngës, vogëlushja që shoqëronte Rozanën në skenë me një arush në krah dhe një interpretim të shkëlqyer, ka qenë më e komentuara deri më tani.
Por kush në fakt është kjo vogëlushe?
Ajo quhet Bianka Toçila, është vetëm 7 vjeçe e gjysmë dhe për të kjo është hera e parë që interpreton para publikut.. Dhe është pikërisht Rozi ajo që e ngjit në skenë në formën më të bukur të mundshme por ndoshta edhe më të trishtë, pasi Bianka ka rolin e një vajze së cilës i duhet të dëgjojë grindjet e së ëmës dhe të atit, një marrëdhënie drejt fundit.
Por ajo që është interesante në këtë interpretim është fakti që Rozi e ka ruajtur Biankën nga ky subjekt i trishtë duke mos i treguar asgjë.
“Fëmijët duhen mbrojtur. Unë nuk mund t’i tregoja një fëmije aq të vogël e të brishtë që do bësh këtë e atë. Jo, unë e lashë Biankën në natyrshmërinë e saj dhe i thashë vetëm: Çfarë do bëje ti për të mbrojtur mamin nëse ajo rrëzohet?” rrëfen këngëtarja për newsbomb.al
Dhe duket se Bianka “rrëzimin” e Rozanës e ka zbërthyer vetiu në një mënyrë të tillë që na ka mrekulluar të gjithëve.
Se Bianka e do shumë punën dhe është e përkushtuar në atë që bënë, flet edhe fakti se ajo qëndroi e zgjuar edhe deri pas mesnate për të pritur shpalljen e fituesit të festivalit dhe bashkë me Rozanën përsëri u ngjit në skenë për të interpretuar rolin e saj, kohë kur moshatarët e saj veç më kanë qenë në gjumë.
