Rihapen tregjet e kafshëve në Kosovë

Pas një pune disamujore në luftën ndaj sëmundjes gungore të gjedhëve, tregjet e kafshëve do të mund të rihapen në të gjithë vendin. Kështu ka thënë Lamir Thaçi, zyrtar për informim në Agjencinë e Ushqimit dhe Veterinës së Kosovës.

Ai ka deklaruar se vlerësimi i dhënë nga drejtoritë përkatëse pas hulumtimit të gjendjes në terren është real, por që në të kundërtën ata do të jenë duke e monitoruar gjendjen në vazhdimësi.

“Pas një pune për këtë periudhë katërmujore, në të gjithë territorin e Kosovës, për ta luftuar sëmundjen, dhe tani përmes drejtorisë për Shëndetin e Kafshëve, t’u lejohet fermerëve për të tregtuar kafshët”, ka thënë Thaçi, në Ora e Fundit të Klan Kosovës.

“Tani bashkërisht me inspektorët komunal do të dalim në terren për të përcjellë gjendjen. Do të vazhdojmë të kontrollojmë nëpër tregje dhe nëse hasim në parregullsi do të veprojmë me kohë. Por ne besojmë që vlerësimi është real dhe që nuk do të ketë nevojë për kurrfarë veprimi kthyes”, tha ai.