Frika nga pushtimi rus në Lituani, manual për mbrojtjen në rast lufte

Shqetësimi për një pushtim të mundshëm rus në Lituani është mëse i qartë, që prej aneksimit të Krimesë nga forcat e Moskës.

Për këtë arsye, autoritetet lituaneze kanë publikuar një manual për 3 milionë qytetarët e saj, me të cilin i udhëzon si të mbrojnë atdheun në rast pushtimi.

Lituania ka rinisur rekrutimet dhe ka rritur shpenzimet për ushtrinë, pa llogaritur thirrjet drejt NATO-s për më shumë trupa të aleancës në territorin e saj, që tashmë janë bërë realitet. Por, këto nuk kanë mjaftuar për të ulur ankthin, ndaj dhe botimi i manualit që titullohet “Përgatitje për t’i mbijetuar emergjencave dhe luftës” e konfirmon këtë, transmeton Top Channel.

Për më tepër, në libër shkruhet se Lituania duhet të ketë kujdes nga veprimet e Rusisë, duke treguar qartë se kujt u druhet, pasi Moska nuk përton të përdorë forcën ndaj fqinjëve. Kjo është hera e tretë, që Lituania boton një manual të tillë që prej aneksimit të Krimesë nga Rusia, ndërsa në të shkruhet se Moska preferon të përdorë metodën e mohimit dhe dyshimit, kur pushton një vend tjetër.

Manuali shpjegon se ka shumë rëndësi, që civilët të jenë të ndërgjegjshëm për rrezikun dhe të kenë vullnetin të rezistojnë, pasi kur këto elementë janë të fortë, agresori e ka të vështirë të pushtojë. Libri me udhëzime flet për armët ruse dhe ka udhëzime për ndihmën e parë dhe mbijetesën në pyje.

Plot 30 mijë kopje të këtij manuali do të jenë të disponueshme në shkolla dhe biblioteka, ndërsa do të publikohet gjithashtu në internet.