Emri i koduar “kërcënim i trefishtë”: kundër kujt të parashtrohen paditë për përgjimet?
Kezharovski dhe dhjetëra gazetarë ende nuk kanë informata se në cilën fazë gjenden paditë që kanë parashtruar kundër një kryerësi të panjohur për përgjim të paligjshëm, pasi lideri i LSDM-së, Zoran Zaev në konferencën për shtyp ua dorëzoi mbi 20 gazetarëve bisedat e përgjuara të transkriptuara, transmeton televizioni 21.
“Informatën që kam qenë i përgjuar parimisht e kam ditur, mirëpo doli edhe zyrtarisht në konferencën për shtyp kur lideri i opozitës e shpalosi listën me njerëzit e përgjuar në kompjuterët e ministrisë së brendshme. Sipas asaj që e posedoj si material, unë jam në mesin e dhjetë personave që kanë qenë objekt i audio dhe video përgjimeve. Emri im i koduar ka qenë “Kërcënimi i trefishtë”, nuk e di kush ka qenë kumbari për këtë emër. Unë dhe disa gazetarë përmes SHGM-së kemi parashtruar padi në Gjykatën Themelore Shkup se kemi qenë “target” i strukturave të MPB-së. Padia është drejtuar kundër një kryerësi të panjohur”, tha Kezharovski.
Përveç gazetarëve, CD me materiale kanë marrë edhe funksionarë tjerë. Megjithatë, avokati Valentin Zafirov deklaroi se padia e funksionarëve kundër operatorit, do të pasqyrohej negativisht në karrierat e tyre.
