Rasti “Kumanova”, avokatja Ademi: Të burgosurit dhunohen psiqikisht dhe fizikisht, institucionet heshtin

Disa prej të akuzuarve në rastin “Kumanova” vazhdimisht ankohen për keqtrajtim rrugës nga burgu deri te gjykata. Këtë shqetësim si çështje e kanë ngritur edhe avokatët e palës mbrojtëse në rastin “Kumanova”, por nga institucionet kompetente nuk ka ndonjë prononcim konkret, shkruan Portalb.

“Gjykatësja dhe Prokuroria vazhdimisht kërkojnë shenja që shihen nga dhuna. Mirëpo, dhuna nuk nënkupton vetëm kur u thehen këmbë dhe duar. Paramendoni të kapësh një njeri me duar të lidhura dhe ta përplasësh për tjetrin. Do të thotë se ai ka lëndime shpirtërore, dhimbje abdominale… parashtrohet pyetja në këso rastesh a duhet raport se ka shenja?! Po gjendja psiqike e këtyre të burgosurve? Mjeku i burgut është mjek i përgjithshëm nuk është specialist”, tha për Portalb avokatja Artene Ademi- Iseini.

Sipas saj përgjegjësi mban Ministria e Punëve të Brendshme, në bashkëpunim me Ministrinë e Drejtësisë.

Redaksia e Portalbit ka tentuar të marr për prononcim zv/ministrin Agim Nuhiu rreth çështjes në fjalë, por zv/ministri ka qenë i pakapshëm.

Seanca e radhës gjyqësore për rastin “Kumanova” mbahet më 6 tetor./Portalb