Çfarë biseduan Thaçi dhe Clintoni më 1999?

Ish presidenti amerikan, Bill Clinton, kishte marrëdhënie të mira me Hashim Thaçi në fund të viteve nëntëdhjetë të shekullit të kaluar, ndërsa pas bombardimeve të NATO-s ndaj forcave ushtarake dhe policore serbe, Clinton uron Thaçin për nënshkrimin e marrëveshjes për demilitarizimin dhe transformimin e UÇK-së, thuhet në një transkript të një bisede që ka publikuar biblioteka e ish presidentit të SHBA-ve.

Sipas ditores serbe Kurir, biblioteka presidenciale ka publikuar dokumentet e reja në lidhje me bombardimin e vitit 1999 vit, ndërsa në transkript të bisedës mes Thaçit Clintonit, më 25 qershor 1999, Clinton i thotë Thaçit se qëllimi i ndërmarrjes së përbashkët ishte i drejtë, transmeton Telegrafi.

“Jam i lumtur që kjo ka ndodhur në të njëjtën ditë kur forcat serbe kanë përfunduar tërheqjen nga Kosova”, tha Clinton, për çka Thaçi e falënderon, duke thënë se ky është edhe sukses i tij. Në këtë rast ai ka premtuar respektimin e të drejtave të njeriut në Kosovë.

“Deklarata juaj në lidhje me respektimin e të drejtave të njeriut dhe të pakicave është shumë e rëndësishme. Pas vuajtjeve të popullit të Kosovës, marrja e udhëheqjes nga ju në këtë aspekt është dëshmi për të gjithë se qëllimi i ndërmarrjes sonë të përbashkët ishte i drejtë”, tha Clinton, për çka Thaçi ia kthen: “Ju falënderoj z. President. Betejë e re që na pret është kthimi i refugjatëve, rindërtimi, zhvillimi i shoqërisë civile dhe zhvillimi e zgjedhjeve të lira e të ndershme shumëpartiake. Edhe këtë ne do ta bëjmë përmes mekanizmave tona, por edhe me ndihmën dhe mbështetjen tuaj”.

Në një tjetër dokument, një memorandum të cilin këshilltari i Clintonit për siguri kombëtare, Samuel Berger, ia drejton shefit të tij e që mban datën e shtatorit 1998, thuhet se janë marrë parasysh opsionet “për shmangien e një katastrofe humanitare në Kosovë dhe për promovimin e një marrëveshjeje politike”.

“Teksa po afrohet dimri dhe (Slobodan) Milloshevici është ende provokues, pjesëmarrësit u pajtuan se është koha që kërkesat ndërkombëtare për arritjen e një zgjidhjeje politike dhe të dhënies fund të dhunës kundër civilëve, të mbështeten me kërcënim të besueshëm të veprimit ushtarak të NATO-s”, thotë dokumenti dhe shton se problemi më i madh është se si të sigurohet mbështetja për aleatët dhe se Rusia është pengesa më e madhe meqë kundërshton përdorimin e forcës.

Në dokumente janë zbuluar edhe detajet e takimit të mbajtur pesë ditë para fillimit të sulmit të NATO-s. Në takim ishin Clinton, Madeleine Albright dhe Berger, ndërsa janë analizuar në mënyrë të detajuar planet e sulmeve ajrore të NATO-s dhe mundësitë se si do të reagonte Beogradi ndaj tyre.