Australia gjen mbetjet e aeroplanit të zhdukur!?

Kryeministri i Australisë, Tony Abbott, ka bërë të ditur gjatë orëve të para të së enjtes, se autoritetet australiane kanë pikasur dy objekte në Oqeanin Indian, të cilat me shumë mundësi i përkasin avionit të zhdukur të Malaysia Airlines, apo fluturimit MH370, me 239 persona në bord.

Raportet e publikuara nga mediat australiane thonë se objektet u gjetën në pjesën jugore të Oqeanit Indian dhe se një aeroplan i Forcave Ajrore Mbretërore të Australisë po përpiqet t’i shqyrtojë më nga afër mbetjet.

Ekipet kërkimore australiane kanë qenë në ballë të përpjekjeve për gjetjen e avionit të zhdukur në mënyrë misterioze, në rajonet më të largëta të jugut të Oqeanit Indian.

Më herët gjatë së mërkurës, hetuesit, që kanë qenë duke shqyrtuar një simulator fluturimi të marrë nga shtëpia e pilotit Zaharie Ahmad Shah, zbuluan se disa prej të dhënave të simulatorit janë fshirë.

Se çfarë nënkupton ky zbulim mbetet ende i paqartë. Por, ky mund të jetë një tjetër hetim “pa rrugëdalje”, si shumë prej teorive të zhdukjes së avionit të hedhura deri më tani, ose mund të rezultojë në sigurimin e provave të tjera për teorinë se një apo më shumë prej anëtarëve të ekuipazhit të këtij fluturimit mund të jetë përfshirë në zhdukje, 12 ditë më parë.

“Ndoshta mund të mos na thotë asgjë. Por, është një nga hapat e procesit”, tha një burim i zbatimit të ligjit në SHBA, për CNN. “Mund të jetë një detaj shumë domethënës në këtë proces tepër të gjatë”.

Hetuesit kanë kërkuar në verifikimin e të gjithë pasagjerëve dhe ekuipazhit të avionit. /Top Channel/

Lajme të ngjashme

Back to top button