Ja çfarë efekte ka Vitamina D
Efektet pozitive të vitaminës D mund të jenë mbivlerësuar, sidomos kur është fjala për sëmundje si depresioni apo skleroza e shumëfishtë. Ky është përfundimi i arritur nga një rishikim i mbi 1600 studimeve të mëparshme, konkluzionet e të cilit u publikuan në revistën “Journal of General Internal Medicine”, transmeton Klan K.
Studimi i drejtuar nga një profesor i Universitetit të Albertës në Kanada ka hedhur poshtë disa prej miteve të krijuara në vite në lidhje dobinë e vitaminës D në disa sëmundje.
Nën “lupën” e studiuesve kanë përfunduar disa prej bindjeve si efekti pozitiv i vitaminës D te reduktimi i frakturave, përmirësimi i depresionit dhe astmës, parandalimi i artritit reumatoid, trajtimi i sklerozës së shumëfishtë apo edhe aftësia për të parandaluar kancerin e infarktin si dhe forcimi i sistemit imunitar.
Ndër këto, e vetmja që bazohet në prova shkencore është aftësia e vitaminës D për të parandaluar frakturat, por edhe kjo jo në masë të madhe, shkruan shekulli. Sipas studiuesve, nëse një grup njerëzish do të trajtohej me vitaminë D për dhjetë vjet me radhë, vetëm gjysma e tyre do të parandalonin frakturat e kockave.
Studiuesit nuk kanë konfirmuar të tjera efekte pozitive të vitaminës D në sëmundje të ndryshme.
