Veliaj vazhdon konsultimet për sheshin “Skënderbej”
Bashkia e Tiranës vijon konsulencën për projektin e Sheshit “Skënderbej”. Kreu i Bashkisë Erion Veliaj ishte në dëgjesë me banorët e njësisë 9, nga ku edhe theksoi edhe njëhrë aspektet pozitive dhe përfitimet që do të kenë këta banorë nga ndërtimi dhe simbolika e projektit.
“Vetëm prona e atyre që kanë shtëpinë në njësinë 9 do të rriten duke pasur parasysh investimin në shesh, unazën e vogël që kemi këtu. Sheshi “Skënderbej” është pika e takimit e të gjithë shqiptarëve. Përfshin pllaka, pemë, shatërvane, po në thelb është propozim për komunitet. Makinat që kaloni para Muzeut, thjesht duhet të kalojnë mbrapa muzeut”, tha Erion Veliaj, Kreu i Bashkisë Tiranë, transmeton TCH.
Veliaj nuk la pa përmendur edhe zërat kritike, që i quajti negative dhe të paargumentuara. Pavarësisht këtyre ai u shpreh i vendosur në vijueshmërinë e punës.
“Që ka njerëz negativ që nuk e duan progresin e Tiranës, kjo u mor vesh. Se po ta donin kishin 4 vjet për ta bërë progresin. Kështu që dotë ketë kundërshtarë te ky projekt. Imagjinoni kur projekti i liqenit, një kënd lojërash që mbaron për katër javë nxorri në luftë dhe presidentin, imagjinoni për sheshin “Skënderbej”, tha Veliaj.
Projekti i sheshit “Skënderbej” do të realizohet në 12 muaj, duke përfshirë në sipërfaqe edhe një pjesë të unazës së vogël. Ndërkohë komunikimi me qytetarët do të vijojë nëpërmjet dëgjesave të tjera.