Berisha: Turp për FMN-në që besoi Ramën
Gjatë një mbledhje të Partisë Demokratike me biznesin fason për paketën fiskale dhe buxhetin, ish- kryeministri Sali Berisha ka hedhur kritika të ashpra ndaj Fondit Monetar Ndërkombëtar, që sipas tij i besoi mashtrimeve të Ramës.
“Kjo që bën kësaj here është një turp i madh për shqiptarët. Të lexojnë raportin që kanë shkruar e të mos i besojnë mashtrimet e Ramës se kjo do të thotë prishje e marrëdhënieve të shqiptarëve me FMN-në. Të ulet me përfaqësuesit e opozitës dhe ti faktojnë që raporti i shtatorit është i drejtë. Ka një borxh të fiksuar në këtë raport, gjithçka është online. Nuk ka audit më të mirë në botë se FMN-ja dhe ka kompetencën më të madhe se çdo institucion, kurse te ne pranoi auditin e asaj që s’mund të pranohej kurrë të një kompanie të kapur në të katër anët me interesa”, tha Berisha, transmeton shekulli.
Berisha i bëri thirrje qytetarëve t’i thonë ndal politikës së qeverisë me paketën fiskale, duke akuzuar kryeministrin Rama se po e rrënon ekonominë dhe po e tërheq vendin me shpejtësi drejt recesionit.
“Po flas si ish-kryeministri i vendit, si një ish kryeministër që është përpjekur shumë për një klimë biznesi, vendosi një model jo të përsosur por i dha frymëmarrje biznesit, do i lejoj vetes të bëj apel te ndërgjegjja qytetare e çdo shqiptari. Në një moment kritik për vendin, kur një ekip i papërgjegjshëm paaftë në historinë e vendit do të trajtojë këtë vend si një lopë për ta tërhequr zvarrë, rrugëve, shesheve, fshatrave dhe qyteteve, ne duhet t`i themi jo me gjithë forcën këtij akti të papërgjegjshëm. Duhet të bëjmë atë që bëri një bukëpjekës në lagjen “Don Bosko” që i shkoi kryekreu për vizitë dhe ia përplasi në fytyrë siç e meritonte. Duhet të bëjmë atë që i bëri një invalid me karrocë që i tha, ku e kam pensionin, pse s’ma jep. Ne nuk mund të ulim kokën përpara kësaj që po ndodh. Po i lë taksat. Unë po ju them që asnjë taksë nuk është rritur përveç naftës. Po ky është një krim i shëmtuar. Dua t`ju siguroj dhe t`ju them se ai që preket më pak nga nafta është ai që ka veturën dhe ai që preket më shumë nga nafta është ai që s`ka veturën dhe mos e konceptoni këtë si një taksë për ata që kanë vetura. Rritja e çmimit të naftës në një vend kur çmimi i saj është nga më të lartit është absolutisht firmosje për ta rrëzuar vendin si një lopë dhe për ta tërhequr në recesion”, tha Berisha.
