Ademi në Turqi: Reformat në arsim u përgjigjen nevojave të tregut të punës
Ministri i Arsimit dhe Shkencës Abdilaqim Ademi merr pjesë në Samitin Global për Arsim i cili mbahet më 26 dhe 27 mars në Stamboll. Në fjalimin e tij ministri i Arsimit dhe Shkencës nga Maqedonia theksoi se është i domosdoshëm që arsimi vazhdimisht të modernizohet dhe të reformohet.
“Sot, ndoshta më shpejt se asnjëherë, është e nevojshme të futen inovacione në arsim. Që të jemi në hap me zhvillimin e mendimit shkencor, ne si Ministri e Arsimit dhe Shkencës dhe si Qeveri e Republikës së Maqedonisë, vazhdimisht punojmë në modernizimin e arsimit edhe atë në të gjitha fushat, në arsimin fillor, të mesëm dhe arsimin e lartë. Reformat e futura në sistemin arsimor në vendin tonë u përgjigjen nevojave të tregut të punës, sepse sikur se çdo vend edhe ne kemi nevojë për arsim dhe kuadër profesional” theksoi Ademi .