Palëvizshmëria
Nuk ka më keq se kaq,
mendoja shpesh,
derisa mblidhja copëzat e zemrës nëpër qilim
nëpër rrugët e fëmijërisë
dhe rrugica të panjohura
rreth lumit
në banjot e kristalta të hoteleve
nëpër karriget e spitaleve
në korridorin e ngushtë me numër tek
në avion…
Po ashtu shpesh jam bindur që ka,
ka shumë më keq,
nuk merr fund dhimbja me ty
as dashuria,
as trishtimi,
të gjitha rrjedhin në mua njëkohësisht
si një dallgë e lartë e së keqes
e unë jam sërfuesi i vetëm
në një ditë pa diell
ku mjegulla ka puthur qiellin e tokën.
Duart i kam të mpira por qëndroj në këmbë
sytë më dhëmbin por nuk mbyllen
shpirti nuk del me zor
rri peng i vuajtjes
plagën gërryej me thonj,
të rrjedh
e rrjedh
deri sa të mpihet gjaku por jo dhimbja.
Asgjë nuk ndodh rastësisht
dhe ka më keq
andaj as shkrimi, as britmat e as heshtja nuk ndihmojnë.
Autori i panjohur