Ymeri për 7 Mars: Do e rikthejmë mësuesin në piedestal
Kryetari i Lëvizjes Vetëvendosjes,Visar Ymeri, ka uruar të gjithë arsimtarët për nder të festës së 7 Marsit.
Ai urimin e ka bërë në rrjetin social Facebook përmes një postimi në llogarinë e tij.
“Sot për 7 mars edhe unë gjej rastin të uroj gjithë arsimtarët e shkollimit shqip, dhe të përkujtoj me përzemërsi edhe përvojat personale me mësuesit e mi. Është dita në të cilën falënderoj edhe mësuesit e fëmijëve të mi për përkushtimin dhe sakrificën.
Por sot është tepër e rëndësishme të flasim edhe për mësuesit e të ardhmes, apo të ardhmen e shkollës shqip,” ka thënë Ymeri, njofton Klan Kosova.
Ymeri më tej ka bërë një paralele të një shkollimi adekuat dhe atij jo të mirë. Shkollën e tanishme ai e ndërlidh me tenderët korruptiv, emërimet partiake dhe tekstet e dobëta, ndërsa premton rikthimin e mësuesit në piedestal.
“Shkolla është e lidhur me shtetin ngushtësisht, dhe me vlerat që dëshiron ky i fundit të përhapë në shoqëri. Përmes shkatërrimit të arsimit, përhapjes së emërimeve partiake e nepotike nëpër shkolla, përmes teksteve të dobëta të komisionuara me tenderë korruptivë, sot shkolla po funksionon shpesh si aparat i shpërndarjes së injorancës.”
“Në këndvështrimin tonë shkolla është guri i themelit për publiken e për kombëtaren. Kjo vlerë do ta rikthejë mësuesin në piedestal.
Në këndvështrimin e tyre shkolla është prodhuese letrash pa vlerë, në kuadër të individualizmit ekstrem si vlerë e promovuar. Kjo e bën mësuesin një shitës të thjeshtë.”
“Ju ftoj të mendoni, cili do të duhej të ishte mësuesi i së ardhmes,” ka përfunduar Ymeri.
