Rrahen keq “Ballistët” me “Varvari” (Foto)

Trembëdhjetë persona të lënduar nga të cilët dy të dërguar në urgjencën e Shkupit, është bilanci nga rrahja që ka ndodhur në mes dy tifo grupeve, “Ballistët” të KF Shkëndija dhe “Varvari” të Klubit Hendbollistik Buduçnost nga Podgorica, që kjo e fundit sot luan ndeshje në Shkup ndaj KHF Vardari, ka njoftuar portali “Kurir”.

Nga MPB kanë njoftuar se incidenti ka ndodhur kur disa autobusë të tifozëve të Shkëndijës po udhëtonin drejt Kërçovës, e ku një nga ta është ndalur në afërsi të urës. Nga ana e kundërt kanë lëvizur tifozët malazez, e ku më pas edhe ka ndodhur përleshja e dy grupeve të tifozëve, të cilët kanë hedhur në mes vete gjësende të ndryshme.

Më tej thuhet se dy tifozë malazezë kanë përfunduar në urgjencë, shkaku i lëndimeve që kanë marrë pas goditjeve me thikë. Jo zyrtarisht mësohet se njëri nga të lënduarit ka marrë tre therje në kraharor, ndërsa personi i dytë kishte lëndime në pjesën e kokës. Autobusët e tifozëve malazez janë dëmtuar. Policia ka arritur në vend të ngjarjes dhe është duke e hetuar rastin. /Portalb /