Mehmeti: Mediat, viktimë e pozicioneve partiake
“Mediat po bëhen viktimë e partive politike”, kështu tha analisti politik Ibrahim Mehmeti në emisionin “10 minuta” pranë televizionit 21. Sipas tij, partitë duke u frikësuar se do të humbin pozicionet e tyre, çështjen e mediave po mbajnë në një situatë të “status quos”.
“Ekziston një mosbesim dhe një frikë për humbjen e pozicioneve nga ata të cilat mund ta përcaktojnë pozicionin e mediave. Është e qartë se për qeverinë ‘status quo’-ja është ajo që preferohet, mirëpo në anën tjetër është e qartë se, nëse Maqedonia dëshiron të krijoj bindje se është e vendosur në procesin e daljes nga kriza politike dhe zbatimin e saj që e ka premtuar, atëherë qasja ndaj këtyre reformave duhet të jetë me e sinqertë dhe më e hapur pa frikë se mund të humb ndonjë pozicion, sepse tek e fundit humbja eventuale e pozicioneve do të thotë liri të madhe për mediat”, tha Mehmeti.
Sipas tij, është e rëndësishme që mediat të bëjnë përpjekje në qartësimin e pozicioneve të tyre, sepse sipas tij ekzistojnë dallime mes grupimeve të ndryshme. Analisti Mehmeti tha se nëse nuk ka koordinim atëherë nuk do të ketë zgjidhje në favor të mediave.
