Blackberry “largohet” nga Pakistani
Gjigandi teknologjik Blackberry do të mbyllë veprimtarinë e tij në Pakistan në fund të vitit 2015.
Kjo ka ardhur si pasojë e kërkesës që qeveria ka bërë për të kontrolluar të dhënat e klientëve të Blackberry.
Qeveria e Pakistanit ka kërkuar të monitorojë çdo mesazh dhe email të dërguar nga telefonat e firmës.
“Të qëndronim në Pakistan do të thoshte të humbnim detyrimet që ne kemi për të mbrojtur privatësinë e përdoruesve tanë. Ky është një kompromis që ne nuk do e bëjmë”- është shprehur shefi i operimit të Blackberry, Marty Beard.
Sipas tij kjo është arsyeja pse serverat e Blackberry nuk mund të operojnë më në vend.
Megjithatë ai ka shtuar se kompania po e lë Pakistanin me keqardhje pasi ishte një “treg” i rëndësishëm për ta.