Shqipëri: Dy viktima nga moti i keq
Në Radhimë të Vlorës, Luan Qarri, gjeti vdekjen pasi rrjedha e lumit e mori me vete.
Në qytetin e Vlorës, reshjet kanë shkaktuar përmbytje në lagjet Pavarësia, 24 Maji dhe 15 Tetori. 8 familje u evakuuan gjatë natës. 3 persona u dërguan për ndihmë në spital.
Rruga për në Orikum kalohet me vështirësi për shkak të rrëshqitjes së dherave.
Raportohet për përmbytje edhe në disa fshatra.
Në Fier, lumi Gjanica ka dalë sërish nga shtrati dhe ka përmbytur disa banesa. Situata është më kritike në lagjen 1 maji. Edhe në Sheq të Madh dhe Sheq të Vogël gjendja është rënduar.
Në qarkun e Durrësit shirat e rrëmbyer të shoqëruar me erë të fortë lanë pa energji elektrike Sukthin, Thumanën, Gjirin e Lalzit, Xhafzotajn, Spitallën, Dervenën, Borizanin dhe zonën e Shkëmbit të Kavajës, trasmeton mapo.
Moti i keq është bërë shkak edhe për pezullimin e lundrimeve në portet e Durrësit dhe Vlorës. Kapiteneritë nuk kanë lejuar daljen në det të anijeve të peshkimit.
Reshjet e dendura të shiut që filluan pas mesnate, herë-herë me shtërngata kanë krijuar jo pak probleme. Në Tiranë raportohen banesa dhe rrugë të përmbytura. Edhe në rrethe, kryesisht në Veri, banorët janë nën pushtetin e ujit dhe në disa zona pa energji elektrike.