LR-PDSH: Shqiptarët, pre e manipulimeve dhe diskriminimit të radhës në MPB!
LR-PDSH, ka reaguar për lajmin se janë zhgraduar shqiptarët që punojnë në MPB, që më pas e mohoi një gjë të tillë zëvendësministri i Punëve të Brendshme Zemri Qamili.
“Nga përfaqësues zyrtar të subjekteve politike që participojnë në pushtet, konkretisht zv. Ministri i punëve të brendshme, këto ditë Zemri Qamili në mes tjerash theksoi se, kanë bërë avancime në punësime në drejtim të rritjes së numrit të të punësuarve dhe kuadrove shqiptare në këtë dikaster, ku në mes tjerash nga komentet zyrtare po veçojmë;
“Në Shkup -15, Kërçovë- 3 , Kumanovë- 2, Manastir- 2, Tetovë- 3, Ohër -1, Makedonski Brod-1 ; Duke vijuar më tej , 70% e kuadrit shqiptar, në 3 sektorë të drejtorisë për siguri dhe kundërzbulim kuadrot shqiptare kanë ngritje për një ose dy shkallë, gjithnjë sipas zv. ministrit Qamili”, thuhet në deklaratën e LR-PDSH-së.
Nga atje theksojnë se Zemri Qamili nuk mbanë llogari për përfaqësimin e shqiptarëve në përqindje, ku sipas konkursit të fundit nga 550 polic janë punësuar vetëm 46 shqiptar.
“Nga konkursi i fundit, në po të njëjtën ministri, vijojnë më tej punësimin e 550 policëve në shërbimet policore ku shqiptarët përfaqësohen me vetëm 46 të punësuar apo 10% nga numri i përgjithshëm. Është indikative se nga ndërkombëtarët aludohet që të anulojnë konkursin. Në një komunë siç është Tetova ku proporcionet e popullatës shqiptare dhe maqedonase janë në proporcion, 95 me 5% , kjo ministri lejon që shqiptarët të përfaqësohen vetëm me 30 % në raport me maqedonasit të cilët mbulojnë pjesën tjetër të të punësuarve gjer më 70%. Sado që pretendohet se shifrat e lartpërmendura nga subjektet politike që ”qeverisin” bëjnë ndryshime në drejtim të punësimit të shqiptarëve, ata as për së afërmi nuk mund ti afrohen 25 %-shit në nivel ministrie. Aq më tepër kur edhe me konkursin e fundit në Tetovë janë punësuar vetëm 25 kuadro të rinj nga të cilët asnjë të nacionaliteti shqiptar”, thuhet në deklaratën e LR-PDSH-së.