Liga e Kampioneve me super duelin City – Juve

Manchester City dhe Juventusi do ta hapin sezonin e ri në Ligën e Kampionëve dhe kjo konsiderohet si përballja kryesore e xhiros së parë. Të dyja skuadrat kanë mungesa para këtij takimi, sidomos klubi anglez, i cili nuk do të mundë të llogarisë në të lënduarit, Sergio Aguero, David Silva e Raheem Sterling. Gjithashtu, “Citizens” nuk do të mundë të llogarisin as në lojtarët tjerë të lënduar, por më pak të rëndësishëm, si Pablo Zabaleta, Fabian Delph e Kelechi Iheanacho. Në anën tjetër, “Bianconeri” nuk do ta kenë në dispozicion mesfushorin, Claudio Marchisio, po ashtu i lënduar, i cili do të mungojë një muaj.

Skuadra e Manuel Pellegrinit i ka fituar vetëm tri nga 11 ndeshjet që kanë zhvilluar në shtëpi në Ligën e Kampionëve në ndeshjet e fundit, ndërsa do të mundohen t’i përmirësojnë këto statistika në duel me gjigantin italian.

“E kemi një skuadër mjaft të mirë, duhet gjithmonë të besojmë në vetveten dhe ky mentalitet duhet të jetë gjithmonë bazë e paraqitjeve tona në Ligën e Kampionëve. Çdo ndeshje ka presion të madh. Juventusi është një klub i madh dhe duhet të jemi të gatshëm. E kemi nisur në mënyrë brilante sezonin, por duhet të vazhdojmë t’i demonstrojmë kualitetet tona”, deklaroi kapiteni, Vincent Kompany.

Nga ana e tij, Juventusi e ka nisur katastrofë sezonin e ri, duke i pësuar dy humbje dhe duke e shijuar vetëm një barazim në tri ndeshje, në Serie A. Përpos Marchisios, Juves i mungon edhe Sami Khedira, që ishte lënduar gjatë përgatitjeve. “Jemi në një grup të vështirë, por i kemi ato që na nevojiten për të bërë mirë. Do ta zhvillojmë ndeshjen në shtëpi të Cityt dhe do të mundohemi të fitojmë pikë edhe atje, por s’do të jetë e lehtë. City është kandidat për ta fituar grupin, por edhe trofeun”, theksoi trajneri i Juves, Massimiliano Allegri.

Grupi A

20:45 PSG – Malmo

20:45 Real M. – Shakhtar Donetsk

Grupi B

20:45 PSV – Man United

20:45 Wolfsburg – CSKA Moscow

Grupi C

20:45 Benfica – FC Astana

20:45 Galatasaray – Atl Madrid

Grupi D

20:45 Man City – Juventus

20:45 Sevilla – Moenchengladbach