Festivali “Teatri shqiptar në Maqedoni”, së shpejti në Dibër
“Festivali Teatri shqiptar në Maqedoni, edicioni i dymbëdhjetë do të fillojë kryesisht më datë 22 tetor dhe do të zgjasë deri më 27 tetor të këtij viti në qytetin e Dibrës”, deklaroi për Portalb drejtori i Festivalit të dramës shqipe, Ylber Nuredini.
Në këtë karvan kulturor do të marrin pjesë trupa teatrore nga Kosova , Shqipëria dhe Maqedonia ku janë selektuar 37 shfaqe, ndërkaq nga këto shfaqe do të përzgjidhen shfaqet më të mirat që të jenë garuese në festivalin e dramës shqipe, shtoi Nuredini.
Sa i takon Ministrisë për kulturë, për këtë festival ka ndarë vetëm 500 mijë denarë , ndonëse harxhimet e përgjithshme janë shumë më të mëdha për këtë ngjarje kulturore ndërkombëtare, theksoi drejtori Nuredini.
Ai më tej potencoi se ka shpresa që këtë festival ta përkrahë edhe pushteti vendor i Dibrës, meqë përherë ka dalë në ndihmë gjatë edicioneve të tjera , gjithashtu kanë ndihmuar edhe Qendra për kulturë dhe ndërmarrje të shumta private.
Edhe përkundër premtimeve të shumta që janë bërë nga skena e teatrit të Dibrës, nga ministra, zëvendësministra, politikanë të shumtë shqiptar se Festivali do të jetë shtylla e kulturës dhe se do të përkrahet përherë nga Ministria e kulturës e gjetkë , përsëri nis “avazi i vjetër” vetëm premtime boshe dhe gënjeshtra të kulluara.
Drejtori Nuredini së bashku me stafin e tij, kërkojnë derë më derë mjete financiare që Festivali “Teatri shqiptar në Maqedoni” të mbijetojë.