Fabius: Të reagohet shpejtë në Maqedoni

Kriza e emigrantëve në Maqedoni duhet të zgjidhet pa shtyerje të mëtutjeshme, deklaroi ministri francez i Punëve të Jashtme, Loren Fabius.

Shefi i diplomacisë franceze dje pas takimit në Pragë me kolegun e tij çek, Lubomir Zaoralek tha se ministrat e jashtëm dhe të brendshëm të shteteve anëtare të BE-së do të bisedojnë për problemin me emigrantët të cilët në numër të madh arrijnë në Maqedoni. Kriza e emigrantëve, siç theksoi Fabius, nuk është problem vetëm i Maqedonisë.

Vetëm në dy muajt e fundit nga Greqia në Maqedoni kanë hyrë rreth 45.000 emigrantë, shumica nga Siria, Afganistani, Iraku dhe Pakistani. Për shkak të valës së emigrantëve nga Greqia autoritetet e Maqedonisë dje shpallën gjendje krize në kufirin jugor dhe verior.

Shifrat zyrtare të agjencisë kufitare të BE-së, Fronteks, tregojnë se në korrik në vendet e BE-së kanë hyrë 107.500 emigrantë. Destinacionet e tyre më të dëshiruara janë Austria, Gjermania, Britania e Madhe dhe Suedia.