Inspektorati gjobit qytetarët ndërsa vet kushtet i ka katastrofale

Papastërti, plasaritje muresh dhe tavane thuajse të shembura që pikojnë nga të gjitha anët, priza nga të cilat rrjedhë ujë dhe kova nëpër dysheme. Këto pamje që ka regjistruar kamera e televizionit Alsat nuk vijnë nga ndonjë shtëpi private, por nga njësia rajonale e Ministrisë së punës dhe politikës sociale në Gostivar e cila duhet të kujdeset për nevojat e banorëve në nevojë. Në këto hapësira vepron edhe inspektorati i tregut dhe punës, drejtori këto që për çdo ditë vendosin gjoba për mos përmbushje të kritereve ndërkohë që vetë punojnë në kushte mesjetare, transmeton Alsat-M.

“Siç e shihni edhe ju, kushtet nuk janë aspak normale. Kështu përballemi çdo ditë është vërtetë shumë rëndë shihet se rrezikohet edhe shëndeti jonë. Kur vinë palët me kërkesat për plotësimin e kushteve minimale teknike, më vjen vështirë ta pranoj një kërkesë të tillë, kur vet objekti jonë që i lëshon ata kërkesa nuk i kushtet”, tha administratori Halim Musliu.

Të punësuarit kanë frikë jo vetëm nga paraqitja e ndonjë epidemie por edhe për jetën e tyre pasi çdo ditë përballen me vdekjen nga shembja e objektit apo paraqitja e ndonjë zjarri nga rrjeti elektrik që i tërë ndodhet në ujë.