fbpx

“Terroriste” është qeveria e Gruevskit!

“Dhuna shfaqet atje ku pushteti vihet në rrezik, por e lënë të vazhdojë dhunën e saj, atëherë me siguri përfundon në zhdukjen e pushtetit. Dhuna mund ta shkatërrojë së brendshmi pushtetin”.
Këto fjalë janë thënë nga Hannah Arendt, teoriciene e çështjeve të politikës, kur flet mbi dhunën politike.
 
Nisur nga ky përcaktim, është e qartë se ajo ç’ka kreu qeveria e Gruevskit në Kumanovë, duke ndërhyrë pa respektuar ligjet në të tilla raste, legjitimoi dhunën politike.
 
Dhunë politike, nuk ka sesi të cilësohet vetëm ajo çka ndodhi në Kumanovë, por një dhunë të këtillë qeveria e Gruevskit e ka ushtruar vazhdimisht me politikat e veta mbi qytetarët, sidomos mbi shqiptarët, përmes keqqeverisjes, korrupsionit dhe pushtetit abuziv e racist.
 
Dhunë politike, mund të cilësohet pa frikë, edhe ajo se qeveria aktuale po iu drejtohet politikave të lindjes, duke u larguar nga aspiratat evropiane të Maqedonisë, ç’ka do të ishte fatale për shqiptarët.
 
Dhe, aspekti më kontradiktor në këtë histori, është se në qeverinë e Nikola Gruevskit është Ali Ahmeti, i cili udhëheq një parti, të “integristëve”, të cilët janë palë me një parti maqedonase, e cila fare mirë iu jep epitetin “ç’integristë”.
 
Dhuna politike e vazhdueshme, në përditshmëri, sidomos mbi shqiptarët, si pakica më e madhe etnike në shtetin e Maqedonisë, shpjegohet nga shkrimtari pacifist Appadurai, në librin e tij “Frikë nga numrat e vegjël”, pra me atë se nataliteti i lartë ndër shqiptarë mund të përmbysë shifrat e popullsisë dhe shqiptarët etnikë të bëhen “rrezik” për të drejtuar shtetin, në një të ardhme jo të largët. 
 
 “Terrorizmi” i qeverisë së Gruevskit 
Fjala “terrorizëm” kurrë s’mund të jetë asnjëanës. Një akt terrorist, sipas përkufizimit, është diçka ilegale dhe moralisht e pambrojtshme.
 
A është “Kumanova”, sipas përcaktimit të fjalës “terrorizëm” një akt i këtillë? Kjo është tepër e dyshimtë. Dhe, fjala “terrorizëm” për rastin e Kumanovës është theksuar fuqishëm nga ata që vështirë se ua duan të mirën shqiptarëve, si Nikola Gruevski, nga Vuçiç, Daçiç dhe Nikoliç.
 
Këtu lindin një sërë pyetjesh aq të mistershme: Pse nuk ka informacione të sakta plotësisht për gjithçka u krye në Kumanovë? A mos ka një aleancë sllavo-maqedonase, pra të Gruevskit me serbët, për ti nxirë shqiptarët në sytë e Evropës dhe të botës?
A po goditet “Kumanova” që të nxitet ndarja e Maqedonisë, në interes kjo të Serbisë dhe të Rusisë, për të krijuar një mini-shtet në lindje të Maqedonisë, model i “Republika Srpska”?!
 
A janë këto veprimë të koordinuara, përmes politikave të nëntokës nga Serbia dhe Maqedonia?!
 
Nxirja e shqiptarëve, duke i cilësuar ata si “destabilizues” të rajonit, duke i lidhur ata me veprimet terroriste, i shkon për shtat propagandës sllavo-maqedonase dhe për të patur të mundur krijimin e ndonjë “mini-shteti” edhe në Kosovë.
 
“Kumanova” ndoshta do të mbetet e tillë, enigmë për shumë kohë, pasi në të ka shumë informacione që nuk jepen, mister, dyshime, ku hyjnë në lojë komplotet e mundshme, shërbimet sekrete e të tilla skenare të errëta.
 
Për këto arsye, qeveria e Gruevskit mund të cilësohet “terroriste”, për politikat e ndjekura në vazhdimësi, në thelb anti-shqiptare.
Ç’integristët e Ali Ahmetit dhe PDSH-istët e Thaçit, duke u angazhuar me politikat e Gruevskit, kanë ndihmuar në politikat e “terrorizmit shtetëror” të aplikuara nga kjo qeveri.
Tags

Lajme të ngjashme

Shiko edhe
Close
Back to top button
Close