Besimi sot në Athinë, takim me homologun grek

Zëvendëskryeminsitri i Qeverisë së Republikës së Maqedonisë, i angazhuar për Çështje Evropiane, Fatmir Besimi sot në Athinë do të takohet me minsitrin grek të Punëve të Jashtme, Nikos Koxias.

Sipas kabinetit të Besimit, temë e diskutimeve pritet të jetë avancimi i bashkëpunimit bilateral ndërmjet dy shteteve në drejtim të mbështetjes së euro-integrimit.

Siç kumtoi MPJ greke, pas takimit, Koxias dhe Besimi do të kenë edhe drekë pune.

Hollësi të tjera për takimin nuk kumtohen. Nuk përjashtohet, as konfirmohet, që dy ministrat gjatë bisedimeve të flasin edhe për propozim masat për ndërtimin e mirëbesimit ndërmjet Maqedonisë dhe Greqisë, si dhe për vizitën e Koxiasit në Shkup, në suaza të turneut të tij nëpër kryeqytetet e Ballkanit Perëndimor, që ishte paralajmëruar për këtë muaj.

Ky është takimi i dytë i zëvendëskryeminsitrit të Maqedonisë me minsitrin grek të Punëve të Jashtme. Besimi në maj të vitit 2013 u takua me shefin e atëhershëm të diplomacisë greke, Dimtris Avramopullos, me të cilin bisedoi për perspektivën evropiane të Maqedonisë, dhe për bashkëpunimin bilateral në fusha të ndryshme.

“Shpresoj se kemi kapacitet dhe trimëri, që sa më shpejt të jetë e mundur, t’i tejkalojmë të gjitha sfidat, përfshirë edhe hapjen e çështjes për emrin dhe të gjejmë zgjidhje të pranueshme të përbashkët për të dy palët, me qëllim që një ditë të jemi pjesë e familjes së njejtë evropiane sepse na pret ardhmëri e njejtë”, kishte deklaruar atëherë Besimi pas takimit me Avramopullos.