Meta: Kosovën e kam mik, por Veliaj fiton me mbi 80 mijë vota diferencë

Kryetar i Kuvendit dhe njëherësh kreu i Lëvizjes Socialiste për Integrim, Ilir Meta, gjatë një interviste në televizionin TCH ka folur në lidhje me zgjedhjet vendore që pritet të mbahen më 21 qershor, ku shprehu bindjen dhe besimin se në Tiranë, kandidati i majtë për bashkinë, Erion Veliaj, do të fitojë me 80 mijë vota diferencë.

Ai deklaroi se kandidatin e djathtë, z. Halim Kosova e Ka mik familjar, por Veliaj do të jetë fitues në këtë garë.

“Rezultat shumë i thellë. Nuk mund ta them sot, por pa dyshim do të jetë një rezultat mbi 80 mijë vota diferenca”,- thotë Meta, ndërsa në një moment të dytë shton: “Dktor Halimin e kemi mik, e duam shumë, jemi edhe miq familjarë, por në këtë rast miqësia është tjetër gjë dhe politika është tjetër gjë. Absolutisht që vota jonë është në drejtimin e duhur dhe është për zotin Veliaj”.

Ndër të tjera kryetari i Kuvendit Ilir Meta, u shpreh se kreu i Partisë Bashkimi për Të Drejtat e Njeriut, Vangjel Dule, është pjesë e koalicionit të majtë. Pas afrimit të PDIU-së në koalicionin qeverisës, Dule u dorëhoq nga posti i nënkryetarit të Kuvendit të Shqipërisë, ndërsa vendin e tij e zuri Shpëtim Idrizi i PDIU-së. “PBDNJ mendoj se është brenda koalicionit. Shpresoj se zoti Dule ta rishikojë deklaratën e tij. Secili ka vendin e vet”,-deklaroi Meta.

Kreu i Kuvendit kritikoi ashpër qëndrimet e opozitës për çështjen e dekriminalizimit të Parlamentit, duke thënë se edhe vetë termi dekriminalizim është bërë qëllimisht nga pakica parlamentare për të dëmtuar imazhin e vendit. “Pjesë e përpjekjes banale të opozitës për të dëmtuar imazhin e vendit. Jemi gati të bashkëpunojmë me opozitës, por edhe këtu ka standarde të dyfishta. Kur i dënon gjykata kandidatët ajo thotë se i bën për arsye politike. Por hajde ta zgjidhim. Ata thonë që do të quajmë të dekriminalizuar ato që duam ne”,-tha Meta./Noa/

Lajme të ngjashme

Back to top button