Lavrov: Rusia e SHBA-ja të bashkëpunojnë për tu konfrontuar me sfidat globale

Ministri i jashtëm i Rusisë, Sergei Lavrov, ka thënë se Moska dhe Uashingtoni janë pajtuar për nevojën e shmangies së hapave që mund t’i dëmtojnë më tutje raportet ndërmjet Rusisë dhe Shteteve të Bashkuara.

Këto komente ai i bëri pas takimit të mbrëmshëm me sekretarin amerikan të shtetit, John Kerry, në pushimoren Soçi të Detit të Zi në Rusi, transmeton REL.

Kerry po ashtu, është takuar edhe me presidentin e Rusisë, Vladimir Putin.

Lavrov tha se diskutimet kanë ndihmuar që Moska dhe Uashingtoni “më mirë ta kuptojnë njëri-tjetrën”.

Zyrtari i lartë amerikan tha se “urgjentisht nevojitet” që Shtetet e Bashkuara dhe Rusia të bashkëpunojnë për tu konfrontuar me sfidat globale.

Ai ka kërkuar nga të gjitha palët në konfliktin e Ukrainës që ta parandalojnë shkeljen e armëpushimit të arritur në muajin shkurt në Minsk të Bjellorusisë.

“Nëse dhe kur Minsku të implementohet tërësisht, është e qartë se sanksionet e Shteteve të Bashkuara dhe Bashkimit Evropian mund të fillojnë të tërhiqen”, tha John Kerry, transmeton REL.

Raportet ndërmjet Moskës dhe Uashingtonit janë përkeqësuar ashpër pas aneksimit të Krimesë së Ukrainës nga ana e Rusisë, më 24 mars të vitit të kaluar.

Perëndimi, po ashtu, e akuzon Rusinë për armatimin e separatistëve prorusë në pjesën lindore të Ukrainës dhe për dërgimin e trupave atje. Moska i kundërshton këto akuza./Indeksonline/